Sisammik suliarinniffissuarmi unngussaaqqasumi sakkutuut naalagaaraat kaptajni: Maani ikiligaaqqasoqarlunilu toqungasoqarpoq

Illoqarfimmi Mariupolimi sisammik suliarinniffiup Azovstalip qaava tamarmi aseqqukuuvoq, nunallu iluani inuit sakkutuujunngitsut illukorsuit aseqqukuisa iluanni mattussaasimapput.

Illoqarfimmi umiarsualiveqarfimmi sakkutooqarnikkut inissisimanermi pingaaruteqartumi paarsisut Ukrainemiut kingulliit ilaat tuluit nutaarsiassaqartitsiviannut BBC-mut oqarpoq.

Sisammik suliarinniffimmiit sakkutooqatigiinnit Azov-imeersoq kaptajn Svjatoslav Palamar oqarpoq,Azovstalimi Ukrainemiut russit saassussisaqattaarnerannut tunniutiinnarsimanngitsut.

- Oqartuaannarpunga maaniitilluta Mariupol Ukrainemiut oqartussaaffigiinnassavaat, BBC-mut oqarpoq.

Svjatoslav Palamar naapertorlugu russit sisammik suliarinniffik umiarsuarnit sorsuutinit qaartartunik eqqaassiffigisimavaat. Qaaratartut taakku taaneqartarput "bunker buster"-inik, nunallu itisuumi iluaniittunik eqquisinnaallutik.

Paasissutissat taakku ilumoornersut BBC-p uppernarsisinnaasimanngilai, kisianni Ukrainemiup sakkutuuni imarsiortuni naalagaata sapaatip akunnerani matumani siusinnerusukkut takunnissimasup oqaasiinut naapertuupput.    

Azovstal-sisammik suliarinniffissuaq suliffissuaqarfissuuvoq 11 kvadratkilometeritut annertussusilik. Nunap iluani sullulianik naqqullu ataani initanik ulikkaarpoq.

- Azovstalip nunataani illut tamarmik ataatsimut taaginnarlugu aserorsimapput. Qaartartut oqimaatsut - "bunker buster"-it igeriuttarpaat, taakkulu annertoorujussuarmik ajoqusiisarput. Maani aseqqukut iluini ikilersimasortaqarlutalu toqungasortaqarpugut, Inuit sakkutuujunngitsut illukorsuit aseqqukut ataanni iluiniipput, Svjatoslav Palamar BBC.mut oqarpoq.

Ukrainemiut Mariupolimi illersuisussat suli qassiunerinik aperineqarami kaptajn Palamar akivoq:

- Saassussisut unitsissallugit naammattut.

Nangilluni oqaluttuarpoq sakkutuujunngitsut suliarinniffissuup ilaani akiuuffiunngitsumiittut, Sakkutuujunngitsut naqqup ataani 80-t aamma 100-t akornanni amerlassuseqarlutik initaniittut.

Kaptajni naapertorlugu nalunarpoq sakkutuujunngitsut qassiunersut, illut ilarpassui aseqqukuummata.

- Sakkutuujunngitsut angusinnaanngisatsinniittut attaveqarfigiinnarpavut, Nalunngilarput aamma meerartaqartut mikingaaramik pingasunik qaammatilinnik, oqarpoq.

AAMMA ATUARUK Mariupolimi sakkutuut qimagunnissaminnut silarsuarmiunut qinnuteqarput

Svjatoslav Palamar tamanut kaammattuivoq sakkutuujunngitsut sisammik suliarinniffissuarmiit qimagutitinneqassasut.

Utoqqaat suliarinniffimmiitttut nakorsaatinik pisariaqartitsipput, ukrainemiullu sorsuttartui annertuumik ikilerneqarsimasut 500 missaanniittut passunneqartariaqarput. Ilaat avatiminnik peersiffigineqartariaqarput.  

- Ullut 52-t mattussaareernermi sakkortuumillu akiuunnermi nakorsaatissaarutilerpugut. Aaamma sorsuttartarvut toqungasut paaraavut, nunatami Ukrainemit nakkutigineqartumi ataqqinartumik ilineqarniassammata, kaptajni oqarpoq.

Sisusinnerusukkut russit præsidentiata sisammik suliarinniffimmik saassusseqqusinini unitsippaa. Taarsiulluguli sakkutuuuni naalkkerpai unnguteqqullugu.

- Suliffissuaqarfi taanna matulluinnarsiuk allaat niviugannguarluunniit aniguisinnaajunnaarlugu, oqarpoq.

Kaptajn Svjatoslav Palamar sakkutooqatigiinnut Azov-imut ilaasortaavoq.