Mariupolimi sakkutuut qimagunnissaminnut silarsuarmiunut qinnuteqarput
Pingasunngorninngulernerani unnuakkut Mariupolimi Ukrainemiut sakkutooqatigiivini kingullerni qullerpaalluni naalagaasoq Facebookimi videomik avitsisimavoq, tassanilu silarsuarmiut sakkutuut sisammik suliarinniffimmi Azovstal-imi unngunneqarsimasut aniguisitaanissaannik qinnuigai.
- Ullussavut kingulliit, nalunaaquttap akunnerinngippagit, tikilerpavut, 36. marinebrigademeersoq Serhij Volyna videomi oqarpoq.
- Akeqqat amerlaneroqaat, tassa quliugaangata uagut ataasiusarpugut. Silaannakkut, qamutileqarnikkut, nunasiortunik sakkutooqarnikkut, atortutigut aamma qamussuit sorsuutitigut periarfissarissaarnerupput. Illersugarput ataasiinnaavoq – sisammik suliarinniffik Azovstal.
Serhij Volynap videomi ilannguppaa Ukrainemiut sakkutuui ikilerneqarsimasut suliarinniffimmiittut 500-usut. Taakku saniatigut sakkutuujunngitsut – taakkununnga ilaallutik arnat meeqqallu – untrilikkaartut tamaanniipput, sakkutuut naalagaat oqarpoq.
- Nunarsuarmiut siuttui tamasa kaammattorlugillu qinnuigingaarpavut ikioqqulluta. Maanngaanniit anillatsinneqarnissatsinnut nunamullu allamut pisinneqarnissatsinnut qinuvugut.
Mariupolimi illuatungeriinnit tamanit paasissutissanik ilumoorneraasoqarnissaa illoqarfimmi akiuunnerit peqqutigalugit ajornakusoorpoq. Kisianni ilimagineqarpoq russit sakkutuuisa Azovstal unngussimagaat, Ukrainemiullu sakkutuui 2500-t sakkutuunngitsullu 1000 sinnerlugit sisammik suliarinniffipiluunersuarmiittut.
Marlunngormat unnukkut Ruslandip Ukrainemiut Mariupolimi sakkutuui illoqarfimmillu unngussaasumit tunniutiinanrnissaannut toqutaanatillu anillannissaannut nutaamik piffissalerpai.
Russit illersornissamut ministereqarfiat naapertorlugu pingasunngornermi danskit nalunaaqutaat malillugu nalunaaqutaq 13:00 namminneq piumassutsiminnik sakkumik iperarnissaannut periarfissaqarput.
Marlunngormat russit assinganik killisiussaat qaangiuppoq Ukrainemiut sakkutuuini ataasiinnaalluunniit erfasoq qaqortoq takutinngikkaa, nutaarsiassaqartitsivik AFP nalunaarpoq.
Mariupolimi aamma Azovstalimi pissutsit inunnut ajunaarnersuartut allaaserineqarput, tassami nerisassanik, imermik nakorsaatinillu pissarsinissaq annertunerpaamik killeqarmat.
Marlunngormat unnukkut Ruslandip sisammik suliarinniffissuarmik qaartunik eqqaassinini nangippaa. Ukrainemiuyt præsidentiata oqaaseqartartua naapertorlugu russit qaartartunik bunkerbombinik taaneqartartunik, tassa nunap iluani itisuumiittunik eqquinissaminnut ilusiligaasunik, atuilersimanerarneqarput.
Azovstal-imi sisammik suliarinniffissuaq angisoorsuuvoq 11 kvadratkilometerinik annertussuseqarluni. Nunap iluatigut sullulianik initanillu naqqullu ataaniittunik ulikkaarpoq.
