Kunngikkormiut tikeraarnerat Sisamanngorneq: Dronningip Ittoqqortoormiit tikeraassavaa
Kongehuset.dk naapertorlugu pilersaarutit imaapput:
Ittoqqortoormiini tikeraarneq nal. 13.30
Dronningi kommunalbestyrelsemi ilaasortanit Charlotte Pikemit Erling Madsenimillu tikilluaqquneqassaaq. Tikilluaqqusinerup kingorna dronningip utoqqaat illuat meeqqerivillu Paarsisoq pulaassavai. Ullullu ingerlanerani innuttaasut peqatigalugit dronningi kaffillertuniissaaq, tassanilu aliikkusersuisoqassaaq tunissuteqartoqassallunilu.
Daneborg Stationimut unnukkut tikeraarneq
Dronningip tikeraarnerani sakkutooqarfimmi angalaarunneqassaaq ilaatigullu Siriusip qimmiisa ineqarfiat alakkassallugu. Dronningimullu Siriusip ukiinermi filmiliaa takutinneqassaaq. Daneborg Station Siriusip alapernaarsuisuisa, naalagaaffiup nunap allanngutsaaliukkamik piginnittuuneranik illersuisut, qitiusumik uninngaarfigisartagaraa.
Kunngikkormiut Nunatsinnut tikeraarneranni pilersaarutit tamakkiisut kunngikkormiut pisortatigoortumik nittartagaanni takuneqarsinnaapput.
