Siornamut missingersuutinik allanngortitsineq nunatta karsianut amigartoorfiugallartoq
Inatsisartut upernaaq manna immikkut ittumik ataatsimiilerunik kisitsisinik eqqartugassaaleqissanngillat.
Taakkuami 2020-mut ilassutissatut aningaasaliissutinut inatsisissatut siunnersuut ataasinngorpat siullermeeriarlugu tallimanngorpat aappassaaneerummik pingajussaaneerummillu, tassa inaaarutaasumik, isummerfigissavaat.
Taamani Naalakkersuisuusut 2020-mi aningaasanut inatsisissaq 2019-imi saqqummiukkamikku 49,6 millionit koruuninik sinneqartoorfiunissaa missingersuutigigaluarpaat. Coronali ajornartoortitseriivilluni naatsorsuutiginngisamik siorna takkuppoq, taamaalilluni siornamut nunatta karsiata missingersuutai allanngorujussuarlutik 455,2 millionit koruuninik amigartoorfiunissaat maannamut missingersorneqarpoq.
Inaarutaasumik inernerunngitsoq
Taama saniatigut siorna aningaasaliisaqattaarneq Inatsisartut aningaasaqarnermut akileraartarnermullu ataatsimiititaliaanit pinerit tamaasa akuerineqartarpoq.
Tamannali inaarutaasumik inerniliuussassaanngilaq. Nunattami karsiata siornamut naatsorsuutai inaarutaasunik kisitsisinik imallit suli piareeratillu saqqummiunneqanngillat. Naatsorsuutillu taakkua saqqummiunneqarpata nunarput siorna qanoq aningaasartortigalunilu isaatitsitigisimanersoq aatsaat tamakkiisumik takuneqarsinnaalissaaq.
- 2020-mut inaarutaasumik naatsorsuutit 2020-mut Nunatta Karsiata Naatsorsuutaaniissapput, aningaasaqarnermut nunamullu namminermut naalakkersuisoq, Asii Chemnitz Narup, Inatsisartunut saqqummiussasamini allappoq.
Tamakkerlugit agguaanneqanngitsut
Nunatta karsiata naatsorsuutai inaarutaasumik saqqummiunneqarpata amigartoorujussuarnissamik maanna missingersuuteqarneq amigartoorutikinnerunermik nassataqarnissaa aningaasaqarnermut naalakkersuisoqarfimmeersut ilimagaat.
Tassunga ilaatigut peqqutaatippaat inuussutissarsiortunut ikiorsiissutissatut siorna illuartitat 150 millionit koruuniusut, tamakkeqqajarnagit agguaasimammatigit.