Sinneqartooruteqartarneq qimanneqarpoq

- Nunatta piorsarneqarnissaa pisariaqartutut isigigatsigu, Nunatta amigartooruteqarluni ukiuni marlunni ingerlanneqarnissaa siunniupparput.

Aningaasaqarnermut Naalakkersuisup, Vittus Qujaukitsup aamma oqaatigaa, sumiiffinni sanaartortitsinissat tulleriiaarneqarneranni Nuuk maanna eqqarsaatigineqanngikkallartoq.

- Nuummi annertuumik pisarioaqartitsisoqarpoq aamma ukiuni kinullerni sisamani Nuuk annertoorujussuarmik piorsaaffigineqarnikuuvoq aamma ilinniatut inissaat eqqarsaatigalugit. Taamaattumik Nuummi sanaartukkat ingerlanneqareersimasut aningaasanik sipaarnitsinnut ilapittuutaassapput. Sumiiffiilli allat ukiuni sisamani kingullerni puigugaasimasut sanaartofrnerup tungaatigut annerusumik ukkanneqarnissaat naatsorsuutigisariaqarpoq.

Vittus Qujaukitsup Naalakkersuisullu illoqarfinnik ataasiakkaanik ineriartortitsinissaanni Ilulissat salliunneqarpoq.

- Inunnik isumaginninnikkut ilinniartitaanikkut piginnaasat annertusarneqarnissaat eqqarsaatigalugu Ilulissani sanaartornerunissarput Naalakkersuisunit nalilerparput aamma inuussutissarsiutitigut ilinniarfiit piginnaasaasa annertusarneqarnissaat tunngasviatigut Naalakkersuisunit pingaartutut isigaarput, taamaattumik ukiuni siuliini sumi sanaartortoqarsimanera aallaavigalugu tulleriiaarinerput taama isikkoqarpoq, Vittus Qujaukitsoq oqarpoq.

2015-imi Nunatta karsiata aningaasat 10 million koruunit sinneqartoorutigisinnaasaattut takorlooriarlugit, 2017-imi  173 million koruunit Nunatta karsiata sinneqartoorutigissagai, Vittus Qujaukitsup siunniussaraa, Vittus Qujaukitsoq aperaara tamanna takorluuinerinnaanngfinnersoq nuannersoq, Aningaasaqarnermullu Naalakkersuisoq ima akivoq.

- Takorluuinerinnartut nuannersuutut isiginngilarput, tassami aaqqissuusseqqinnerit, inuiaqatigiinnut annertuumik ajornartorsiutinik aallaaviusut, ullumikkut qanoq iliuuseqarfiginerisa kingunerisaannik annertuumik iluaqutaassaaq aamma aningaasat taakku assigiinngitsuni aaqqissuussinerni annertuisiartortumik sunniuteqarlersussaassapput. Sunniutissai inatsisitigut taavalu sipaarutissat annertusineri peqqutaalluni sinneqartoorutit amerliartiornissaannik naatsorsuuteqarpugut.

Aningaasaqarnermut Naalakkesuisoq Vittus Qujaukiutsoq taama oqarpoq.

Inatsisartuni illuatungiliuttut Inuit Ataqatigiit siulittaasuat, Kuupik V. Kleist aperaarput 2017-imut sinneqartoorutissatut Naalakkersuisut siunissaat piviusorsiortuunersoq, Kuupik V. Kleist ima akivoq.

- Suliffissaqartitsiniarnikkut kinguneqarnerpaaq tassaavoq sanaartortitsineq, tamassumunngalu aningasaliissutit affaannanngorpata suliffissat ikiligaatsiarnissaat naatsorsuutigisariaqarpoq. Aamma suliffissaqartitsineq tassaavoq inuiaqatigiit aningaasarsiornerannut pingaaruteqarnerpaaq. Taamaattumik amigartooruteqarujussuarneq ukiualunnguit ingerlaneranni sinneqartoornerujussuarmut mumisissagaanni upperiuminaappoq uku saqqummiunneqartut isikkuat eqqarsaatigalugu. Sanaartortitsinermullu aningaasaliissutit ikilineqarpata naatsorsuutigineqassaaq suliffissaaleqqinerup annertusinissaa.

Kuupik V. Kleistip aamma oqaatigaa, Naalakkersuisut nunap immikkoortuisa ataasiakkaat ineriartortinneqarneranissaanni inuussutissarsiutitigut ineriartortitsineq inernumanartutut isigisariaqartoq.

- Saqqimmiussami maluginiarpara sanaartortitsinermut aningaasaliissutit ikileriagaatsiarsimasut. Uangut Naalakkersuisuunitsinni tamassumunnga aningaasaliissutigut amerlanerujussuupput. Inuussutissarsiutinik ineriartortitsineq tassaavoq Nunatta ningaasarsiorneranut pitsaasumik qulakkeerinninniarneq, ineriartortitsinerlu annikillisinneqassappat tamanna ernumanartutut uanga isigaara.

Inuit Ataqatigiit siulittaasuat, Kuupik V. Kleist taama oqarpoq.