Enoksen Pisassiissutit sinerissap qanittuani aalisartunut ammaakkusukkai
Tamanna inuiaqatigiinnut akeqartussaavoq, kilisaatinilli pisassiissutinik aalleriarluni pisassiissutit aalisartunut allanut siammaannissaat Aalisarnermut Naalakkersuisup, Hans Enoksenip angorusuppaa.
- Nutaamik aallartinniarpugut, aalisariutit pisassaqanngitsut periarfissillugit taamaalilluni sinerissap qanittuani pisassaqanngitsut ilaatigut aamma anillaassinnaanngornissaat anguniarneqarpoq.
Hans Enoksen oqarpoq.
AAMMA ATUARUK Rosingip Enoksenip akissuteqarnera aalassassimaarutigaa
Demokraatit isornartorsiuipput
Taamaalilluni kilisaatinit pisassiissutit 10 procentinik ilanngariarlugit pisassiissutit aalisarumasunut qinnutigineqarsinnaanngussapput.
-Kilisaatit aalisariutaateqarnerminnut atatillugu aningaasartuuteqarput, aalisartuupput nunaminilu aningaasarsiortuullutik pisassiissutillu tassanngaannartumik ilanngarneqarnerat pissusissamisuunngitsoq, Demokraatineersup Michael Rosingip Hans Enoksenimut isornartorsiulluni tunngavilersuuteqarpoq.
Suliffeqarfiit ernumassutiginngikkai
Tamannali aalisarnermut naalakkersuisumit illuatungilerneqarpoq.
Aalisagartassiissutit annerpaartaat kilisaataatilinnut ikittuinnarnut pigineqalersimasut, Hans Enoksen isumaqarpoq:
-Ajoraluartumik aaqqissuussinikuuvugut ukiorpassuarni, pisassat annertoorujussuit selskabenit ikittuinnarnit pigineqalersimallutik, taamaalilluni aalisartorparujussuit inuusuttullu periarfissaat mattunneqarsimapput ilaatigullu killeqarluinnarlersimallutik, Hans Enoksen oqarpoq.
Aalisarnermut inatsisissap naammassineqarnissaa Hans Enoksenip piffissanngorsoraa.
Taamaattoq suliffiit ikittuinnaat pillugit sunniuteqarluanngitsumik aalisartitsinissaq pissutissaqanngitsoq, Michael Rosing isumaqarpoq.
Sinerissalli qanittuani aalisarsinnaaneq ammaanneqarpat aningaasarsiortoqarnerulernissaa Aalisarnermut naalakkersuisup ilimagaa.
- Selskabet taakkua naammattorsuarnik peqareerput uagullu aalisartut nutaat pisassaqaratik taakkununngaana nuussiniartugut, minnerpaamilluunniit taakkununnga ajornartorsiutaanngitsumik.
Naak kilisaataatillit umiarsuaatiminni aningaasarpassuit atortaraluaraat taamaattoq kilisaataatilissuarnut naleqqussartoqassanngitsoq Hans Enoksen erseqqissaavoq:
- Inuiaqatigiit naleqqussarfigineqassapput selskabenuunngitsoq, selskabenut naleqqussaraluarutta naggataatigut uagutsinnut sussaarulluta isiginnaartuinnanngussaagut, Hans Enoksen oqarpoq.
Pisassiisutit agguaanissaannut atatillugu qinnuteqartoqartoqarsinnaassaaq, Naalakkersuisullu akuersereerpata upernaaru agguaassisoqarsinnaanngornissaa pilersaarutigineqarpoq.
AAMMA ATUARUK Enoksenip Royal Greenland namminersortunngorsarusuppaa
