Rosingip Enoksenip akissuteqarnera aalassassimaarutigaa
Demokraatineersoq Michael Rosing paragraf 37-imut apeqquteqarnerminit akissutersereerluni taama isummerpoq.
Aalisarnermut naalakkersuisup Hans Enoksenip avataani aalisagartassat aalisarnermik sulialinnut amerlanerusunut agguaanniarini erseqqissaatigaa, aamma inuiaqatigiinnut aningaasanik naleqaraluarpalluunniit.
Naalakkersuisut aningaasaliisartunut taama tusarliinerat Rosingip uggoraa.
- Assut uggornarpoq, Michael Rosing oqarpoq.
AAMMA ATUARUK Suliffissat aningaasatigut annaasaqaatinit pingaarnerupput
Aningaasaliisinnaasut qimaatinneqassasut
Taassuma Enoksenip pisassat aalisarnermi sulialinnut amerlanerusunut agguataarunniarmagit, aningaasaannaanngitsutigut akisusssasoraa.
Pisassinneqarsimasummi nunatsinni aalisarnermut aningaasaliingaatsiarsimasut taamalillutik pillarneqalissasut taanna isumaqarpoq.
- Pangallannertut isigisara tassaavoq, aatsitassarsiortitseqatigiiffiit nunatsinni politikkikkut qanoq ingerlatsisoqarneranik misissuilerunik inuit aningaasaliillutik, aalisarlutik, aningasanik nunatsinnut isaatitsisut aalisagartassaminnik arsaarneqariataartut, allat pisassinneqarniassammata, takulissagaat, Rosing oqarpoq.
Nunattalu tusaamaneqarnera taama iliuuseqartoqarneratigut innarlerneqassaaq aningaasaliisinnaasullu qimaatinneqarlutik.
AAMMA ATUARUK Enoksen pisassiiaartoqarnissaanik neriorsuisoq
Pisassiissutinut taakkununnga aalisartoqarnerusoq
Ullumikkut pisassiissutit tamakkiisut kilisaatit tamarmik pisarisinnaasaannit ikinnerupput. Ukiumut pisassiissutit qaammatini qulini aalisartarpaat qaammatinilu marlunni aallassanatik. Kilisaatit katillugit qaammatini qulini aalisarnatik uningaannartarput.
Enoksenilu kilisaammik nutaamik aalisalersitsippat, uningaannartarnerat suli sivisunerulissaaq. Tassa aalisarnermi suliffissat amerlissapput, inuiaqatigiilli kilisaatillu allat aningasarsiornerannut tamanna ajoqutaassaaq. Tamannalu Enoksenip nammineerluni nassuerutigaa.
- Avataasiortunut amerlanerusunut pisassiissuteqarneq inuiaqatigiinni aningaasaqarnikkut annaasaqaataasinnaavoq.
Rosingip tamanna eqqarsarnartoqartippaa.
- Aperisoqarsinnaavormi, kinaana pisassiissuteqarfigineqarniartoq. Naalakkersuisut ikinngutaasa arlaat pisassiissutinik amigaateqarpa imaluunniit susoqartoruna?
