Enoksen: Suliffissat aningaasatigut annaasaqaatinit pingaarnerupput

Enoksenip akissutimini oqaatigaa kingullertigut suliniutigisami nunatta aningaasaqarneranut iluaqutissartaqannginnera apeqqutaanngitsoq suliffinnik amerlanerusunik pilersitsissammat. Suliffissat inuiaqatigiit akilertariaqagaat.

Enoksenip unneqqarilluni oqaaseqarnera apeqquteqartup Demokraatineersup Michael Rosingip nuannaarutigaa
 
- Suliffissanik amerlanerusunik pilersitsiniarnerup inuiaqatigiinnut aningaasaqarnikkut annaasaqaataanissaa ajorinngilaa.
 
Enoksenili isumaqatiginngilluinnarlugu Rosingip erseqqissarpaa.

Suliffinnik pilersitsinissamut aningaasarsiortoqarli

Demokraatineersoq isumaqarpoq aalisarneq aningaasarsiornissaq qitiutillugu niuernerpalaartumik ingerlanneqartariaqartoq, aningaasallu iluanaarutaasut suliffissanik pilersitsinermut atorneqarsinnaasut.
 
- Assersuutigalugu suliffinnik nerpittaajaaffiusunik, imaani ingerlanneqartuugunik aningaasarsiorfigisinnaagaluakkatsinnik pilersitsinani, suliffinnik meeqqanik ikiortarialinnik sullissiffiusunik pilersitsisoqarnissaa orniginartinnerugaluarpara.

AAMMA ATUARUK Enoksenip Royal Greenland namminersortunngorsarusuppaa

Enoksenilli kilisaatit amerlanerusut aalisagartassat allanngortinnagit aalisartikkusuppai, taamaaliornikkut aalisartut arfinillit, aalisartut tallimat ullumikkut aaligartagaat aalisalerpatigit suliffinnik amerlanerusunik pilersitsisoqassammat.

Ullumikkummi pissutsit imaapput, pisassiissutit tamakkerneqarsimanerat pissutigalugu kilisaatit ukiumut qaammatini arlalinni uninngasariaqartarlutik. Kilisaatillu amerlineqarnissaannut Enoksenip tamanna tunngavilersuutigaa.

- Takutiinnarneqarpoq, aalisartoqartugut taama pimoorussitigisunik pikkorissunillu. Tamakkuninngalu amerlanerusunik peqartariaqarpugut. Taamaattumik uanga pisussaaffigaara aalisarnermi akuusunut nutaanut ammaassinissaq qulakkeerussinissarlu, Enoksen taama akissuteqarpoq.

AAMMA ATUARUK GE-p pisassiissutinik immikkoortitsisoqarnera isornartorsioraa

Enoksenip aamma erseqqissaatigaa pisassiissutit kilisaatinut amerlanerusunut agguataarnerisigut aalisartut nunaqavissut salliutinnissaat pingaaruteqartoq.

- Naak aamma tamanna imaasiallaannaq inuiaqatigiinnut aningaasaqamikkut annaasaqarnermik kinguneqassagaluarpat, Enoksen allappoq.
 
Tamannalu Michael Rosingip paasiuminaatsippaa.
 
- Asuli suliffissanik pilersitsiniaannarluni aalisarnermik sunniutikitsumik pilersitsinissaq pissutissaqanngilaq.

AAMMA ATUARUK Enoksenip qaleralittassiisarneq allanngortikkusukkaa