Sinerissamut qanittumi avataanilu pisassanik saarullittassiisoqarpoq
Pinngortitaleriffiup Tunumi Kitaanilu aappaagu saarullittassatut innersuussutini maanna tunniussimalereerpai.
Saarullinniarnermi mianersortumik tunngaveqarnissaq biologit malinniarpaat. Matumani sinerissamut qanittumi avataasiorlunilu aalisartut pineqarput. Tamatumunnga pissutaavoq suli qanoq saarulleqartiginera qanorlu angissusilínnik saarulleqarnera aamma qanoq iluaqutigineqarsinnaanerat nalorninartoqarmat.
Taamaattumik 2013-imi sinerissamut qanittumi saarullittassat 8.000 tonsiunissaat innersuussutigineqarpoq, taannalu tassaalluni ukiuni kingullerni qulini saarullittarineqartarsimasut agguaqatigiissinnerat.
Saarullinnut avataaniittunut tunngatillugu 2013-imut innersuussuussummi siunnersuut allanngornani toqqaannartumik saarullinniaqqusinngilaq. Paasissutissammi pigineqartut tamarmik takutippaat, avataani saarulliit 1990-ikkunnut naleqqiullugu suli ikippallaartut.
Pinngortitaleriffimmit oqaatigineqarpoq, 2005-ip kingornagut saarulleqatigiinni taakkunani peqassuseq pitsannguallassimasoq, kisiannili Tunumi suffisartut - Kitaani nutaanik saarulleqalernissaanik aalajangiisuusut - illersorniarlugit aalisarneqannginnissaat innersuussutigineqartoq.
Biologit 2011-mi misissuinerisa ersersippaat, saarulleeqqat 2009-mi tukertut amerlasoorujussuusut. Saarulliit tamakkua siunissami malittarineqarnissaat pingaartuuvoq, taakkumi Kitaani saarullinniarnermut iluaqutaalersinnaammata.