Simon Thomson Cairn Energymi pisortaaninngussaaq
Simon Thomsonip taarsissavaa maannamut pisortat qullersarisaat suliffeqarfiullu aallarniisua, Bill Gammell. Taanna Cairn Energymi siulersuisuunerni siulittaasunngussaaq.
- Kalaallit Nunaanni uuliasiorniarnermi Simon pingaarutilimmik sulisimavoq, ukiunilu kingullerni 15-ini Cairn Energymi suleqataasimalluni, Gammellip BBC-mit apersorneqarnermini Simon Thomson pillugu oqarpoq.
- Suliffeqarfitta suliassaannut tulliuttunut ingerlateqqiiniarnera eqqarsaatigalugu nuannaarutigaara Thomson pisortanngornissaminut akuersimmat, Gammell oqarpoq.
Bill Gammell aappaagu 60-inik ukioqalersussaavoq. Taassuma suliffeqarfissuaq Cairn Energy 1980-imi aallartinnginnerani Skotlandimi rygby-mik arsartartuuvoq, ilisarisimaneqaatigalugulu amerikami præsidentiusimasumut, George W. Bushimut ikinngutaalluartuunini.
Gammell tuluit nersornaasiuttagaannik pingaarnerpaamik nersornaasigaasimasoq, Cairn Energyp aallartinnerani 1992-imi 10 millioniinnarnik nalilik ukioq manna 10 milliard koruuninik naleqalersissimavaa, tassa tusinderiaammik naleqalersillugu.
Uuliasiorluni qillerinerni aasaq manna isumannaallisaanerup pilersaarutaasa kikkunnit tamanit takuneqarsinnaanissaat eqqarsaatigalugu Simon Thomson oqartarpoq, tamanna Namminersorlutik Oqartussat kisimik akisussaaffigigaat. Aamma taassuma oqaatigisarpaa, Cairn Energy neriorsuisimanngitsoq akuutissat kemikaliat aappaluttunik taaneqartartut maangaannaq maqitinneqarnissaat aappaagu qillerinerni appartinniarlugu.
