Simon Lyngep London tiguarpaa

Tuluit Nunaanni Rasmus Lyberth kalaallini nipilersortartuni kisimi ulluni makkunani nuannarineqanngilaq. Radioqarfiup BBC Londonip aallakaatittagaani Sunday Night Session-imi, erinarsuusiortartoq Simon Lynge sapaammi unnukkut pingaarnertut aallakaatinneqartunut ilaavoq. Aallakaatitsinermi tassani Simon Lyngep erinarsuusiani pingasut atorpai.

Aallakaatitassiami Simon Lynge imminut oqaluttuareqqullugu ilaatigut qinnuigineqarpoq. Tassanilu Kujataani peroriartornini oqaluttuaraa, angummi supputaasartarnera aamma anaanami eqqiaanermini nipilersukkanik tusarnaartarnera oqaluttuaralugit.

Simon Lyngep ilanngullugu oqaluttuaraa, Kujataani Alluitsumi illumik nutartigassaminik pisiniarluni, nunaqarfiusimasormi taanna imminut pingaaruteqarluinnarmat. Ilaqutaani kinguaariit sisamat tassani najugaqarsimapput. Maannali aappariit utoqqasaat nunaqarfiusimasumi tassani kiserngorussimapput. Taassumalu Alluitsup inuerutinnnginnissaa pingaartippaa.
Simon Lynge aasaq manna ulapaangaatsiarpoq, tassami koorborpalaartunik erinarsortartup Emmylou Harrisip tusarnaartitsisaqattaarluni angalanerani kissassaasutut erinarsortarami. Taamatut angalanerminni  Tysklandimi Berlinimi radioqarfimmi nuannarineqarnerpaami Radio 1-imi ilaatigut erinarsorpoq. Tamatuma saniatigut nunarsuatsinni nipilersornermik aaqqissuussisarnerit annersaasa ilaani Tuluit Nunaanni Glastonburry Festivalimi nipilersorpoq. Erinarsugaa If You Go maanna nuannarineqaqaaq.

Cd-liaa The Future aggustimi saqqummerseqqinneqassaaq, tassani erinarsukkat atugai tamarmik nutarterneqarsimallutik. Simon Lyngelu novembarimi Nunatsinnukassaaq.