Simon Lynge aliasoqisoq aningaasatigut ikioqqusoq

Simon Lynge sanilerisanilu sapaatip akunnerata siuliani oqqatsereersullu ajutoorneq pivoq.

Oqqatereeramik Simon Lyngep hotdogi avinniarlugu savimmik kilerujussuarsimalluni, Facebookimi allaaseraa.

- Seattlemi assaat pillugit immikkut ilisimasalimmi ippassaq nakorsamiippunga,  (sapaammi aaqq.) assamalu talerperliup aalasaataasa aaqqinnissaanut periarfissakitsuararsuuvoq, Simon Lynge aliatsassimaqisoq  allappoq.

Assami inuaani pingasuni naggussap noqarutai, sianiutai taqaalu innarlersimallugit ilanngullugu ilisimatitsissutigaa.

- Nipilersoriutsinnik takunnissimasut tusarnaarsimasullu tamarmik nalunngilaat guitarertarninni inussakka atorlugit appisimaartartunga, soorunami aamma pattagiarnermi. Uummatiga sequmeqqavoq. Guitari nipilersornerlu inuuninni nuannaarutaalluinnartuupput ilaqutakkalu nipilersortarnikkut pilersugaraakka.

Simon Lyngep imminut ilaquttaminullu qaammatini tulliuttuni aningaasarsiorniarnissaa ajornarkusoortussanngorpoq.

Taamaammat Facebookimi malinnaasuminit aningaasatigut ikioqquvoq.

- Iluarseqqinnissannut eqqissisimaartariaqarpunga, qanorli sivisutigissanersoq ilisimanngilara, taamaattumik nipilersorlunga appisimaarnissannut aningaasarsiorsinnaanngikkallarpunga (...) Uatsinnut ikiuinersi qaammatini tulliuttuni ikiuutaassaaq, uangalu assama sungiusaqqinnissaanut aningaasartuutissanut tapersiutaassallutik, tamannami assama aaqqeqqinnissaanut nakorsama pilattaasartup pingaartorujussuunerarpaa.

Simon Lyngep ilaqutaanullu aningaasat 4375 dollarsit maannamut katersorneqarput.