Sillimaserneqanngikkaani nunanut allanut angalanissaq akisunaarneqarsinnaavoq
Angalasinnaannginnerit taakku, kinguartoornertut aallanngittoornertullu allatut isigineqassapput.
Taamaasilluni Air Greenlandip angalasussaagaluit, angalasinnaanngitsut unnuineri nerisaqarnerilu isumagissavaat. Tassani eqqarsaatigineqarpoq, aatsaat unnuiffissaqanngivissornermi Air Greenlandip unnuisinnaanermut akiliinissaa, taamak Sermitsiaq.gl allappoq.
Angalasussanullu aamma nalunaarutigineqarpoq, angalasussaagaluit billitsissartik utertissinnaagaat aningaasartaallu tigusinnaallugit, imaluunniit angalaleqqinnissamut utaqqisinnaasut.
Angalasussaagaluit eqqorneqarnerpaasussat tassaapput, Air Greenlandip avataatigut angalatitsivinnut allanut ilaallutik angalasussat. Taakkummi billitsissaat suneqarsinnaanngillat, apeqqutaaginnassaarli angalasussap angalanissani nammineerluni sillimasersimanerlugu.
