Silarlunnera timmisartukkut angallannermut akornusiivoq
Air Greenlandip timmisartuusseqqaarnissaanut billetsit tamangajammik pisiarineqarsimagaluarput, Aalborgimullu tikimmat nerriviliortoqarsimavoq, kaagillertoqarluni erfalasoqarlunilu. Ilaasussalli tamarmik Kangerlussuarmut piffissaq eqqorlugu tikissinnaasimanngillat.
Nuummit ilaasussarpassuugaluit Kangerlussuarmut anorersuarnera peqqutigalugu tikinngitsoorsimapput, allallu timmisartorsuaq aallareersoq aatsaat tikissimagaluarlutik.
- Timmisartumik allamik ilaaffigisinnaasaannik tuaviortumik pissarsiorpugut, angallaffiuleruttormalli naleqquttumik nassaarnissaq ajornakusoorpoq, Air Greenlandimi qullersaqarfimmit Christian Kjeldsen oqarpoq.
Aalborgimulli timmisartuussisalerneq iluatsilluartutut taaneqarsinnaalereersoq isumaqarpoq. Aasaanerani qaammammut ataasiarluni, tassalu juunimi, juulimi aamma aggustimi timmisartuussinissat pilersaarutaapput.