Silap pissusiata pimoorussamik oqaloqatigiissutigineqarnissaa Naalagaaffiit Peqatigiit qullersaata kissaatigaa

Silap pissusia pillugu Parisimi 2015-imi ataatsimeersuarnermi silap pissusia pillugu isumaqatigiissusiortoqarnissaanik suliniuteqarnermut atatillugu Ban Ki-moon nunatsinnut tikeraarpoq.

Silap pissusia pillugu aallarniutaasumik ataatsimeersuarneq septembarimi pisussaavoq. Ataatsimeersuarnermilu tassani nunat silap pissusianut atatillugu anguniakkaminnik tigussaasunik maannangaaq saqqummiussaqarnissaat sulissutiginiarpaa.

- Ban Ki-moonip silap pissusia pillugu ataatsimeersuarnerit siuliinut naleqqiullugu nunarsuarmi nunat siusinnerusukkut aallartitsinissaat sulissutiginiarpaa. Nunat siumoorlutik sunik pilersaaruteqarnerminnik oqaaseqarusunnginnerat Københavnimi 2009-mi isumaqatigiissuteqartoqannginneranut ilaatigut pissutaasimavoq, aviisimi nittartakkami Mandag Morgenimi silap pissusianut tunngasunik naliliisartoq, Esben Alslund-Lanthén, DR Nyhederinut taama oqarpoq.

Naalagaaffiit Peqatigiit silap pissusia pillugu nalunaarusiaanni nutaami, siornatigut ilimagineqarsimasumit ajornerusumik inerniliisoqarsimanera silap pissusianut tunngatillugu isumaqatigiinniarnissat pingaaruteqassusaat sakkortuseriaannarpoq.

Nalunaarusiaq pisortatigoortumik suli saqqumminngilaq, tusagassiortulli paasissutissanik arlariinnik pissarsisinnaareersimapput.

- Nalunaarusiap nutaap ersersippaa maanna inissisimanerput silap pissusia pillugu nalunaarusiap kingullermi saqqummersinneqartup inerniliussaanit ajornerusoq, Esben Alslund-Lanthén DR-imut taama oqarpoq.