Silap pissusia pillugu nittartagaq nutarterlugu atoruminarninngortinneqartoq
Nittartakkami silap pissusiata allanngornerata kingunerisaanik nunarput qanoq sunnerneqassanersoq takuneqarsinnaavoq, allannguutinullu qanoq naleqqussartoqarniarnersoq.
Nittartagaq sisamanik iserfissaqarpoq: innuttaasunut, kommuninut, inuussutissarsiutinut ilinniarnermullu. Taamaalilluni ilisimasat atuarfinni ilinniarnertuunngorniarfinnilu ilinniartitsinermi atorneqarsinnaasut ataatsimoortinneqarlutik.
Taakkua saniatigut aamma siunissami silap qanoq issangatinneqarnera pillugu paasissutissat nassaarineqarsinnaapput, Kalaallit Nunaata gassinik silaannarmik kissatsitsisartunik aniatitsineranut tunngatillugu paasissutissat Kalaallillu Nunaata nunanik allanik sila pillugu suleqateqarneranut tunngasut nassaarineqarsinnaapput.
Assersuutigalugu nalunngiliuk siunissami Kalaallit Nunaanni immap killinga appassangatinneqarmat, nunarsuaq tamakkerlugu qaffattussaagaluartoq. Tassa ima isumaqarpoq Kalaallit Nunaat allissasoq, massa Manerassuarmi qeqertaaqqat ilaat morsussasut.
