Silap pissusia pillugu isumaqatigiissut nunatsinnut akisusinnaavoq
![](/sites/default/files/styles/image_934x467/public/article_images/cop21_mark_dixon_flickr_1.jpg?itok=agtmJAxF)
EU-mi isumaqatigiinnginneq peqqutigalugu, nunat inoqqaavisa pisinnaatitaaffiisa isumaqatigiissummut ilaanissaannik sulissutiginninnissamut Danmark, taamaalillunilu nunarput, periarfissaqarsimanngitsoq, §37 naapertorlugu apeqquteqaammut akissummi erserpoq.
Maanna naalakkersuisut silap pissusia pillugu Naalagaaffiit Peqatigiit ataatsimeersuartitsineranni COP21-mi nunarsuarmi nunat isumaqatigiissutigisaannut nunarput ilanngutissanersoq isumaliuutersuutigaat.
Aamma atuaruk COP21-mi Canadap nunap inoqqaavinut tunngasut tamaviaarutigigaluarpai
Naalakkersuisut nalunaarutigisaat kingulleq eqqarsaatigigaanni, Inuit Ataqatigiit siulittaasuata, Sara Olsvigip, §37 naapertorlugu apeqquteqaataanut akissuteqaat, nunarput isumaqatigiissummut ilanngunnissaminut akissaqannginneranik tikkuussivoq.
Isumaqatigiissummullu nunat inoqqaavisa pisinnaatitaaffiisa ilaatinneqannginnerannut peqqutit annersaat tassaavoq inatsisitigut atuuttussanngorlugit innersuunneqarsimannginneri.
Innersuussutimmi nunarput allaanerusumik inissisimatissinnaagaluaraa, naalakkersuisut oqaatigaat.
Aamma atuaruk Lilleholtip Kalaallit Nunaata isumakulunnera paasisinnaavaa
Taamaalillunimi suliffissuaqarnikkut ineriartortitsinissanut periarfissanik taamaatitsinngikkaluarluni, nunarput isumaqatigiissummut ilanngussinnaagaluarpoq.
Nunat inoqqaavisa pisinnaatitaaffii isumaqatigiissummi ilaajunnaarmata kalaallit danskillu naalakkersuisui iliuuseqarpiarsinnaanngillat.
- Danmark skandinaviamilu nunarpaaluit allat, nunat inoqqaavisa pisinnaatitaaffii isumaqatigiissummut ilaatinneqarnissaat sulissutigingaatsiaraluarpaat. EU-milu nunat, Danmark ilanngullugu, silap pissusia pillugu isumaqatigiinninniarnermut nammineerlutik isumaqatiginninnianngillat, EU-mulli ilaasutut isumaqatigiinninniarlutik.
- EU-llu iluani ataatsimut sammiveqartoqannginnera peqqutigalugu, nunat inoqqaavisa pisinnaatitaaffiisa EU-mit isumaqatigiinniarnerni ingerlateqqinnissaat periarfissaasimanngilaq. Tamanna nunanut allanut tunngasunut naalakkersuisup, Vittus Qujaukitsup, aammalu pinngortitamut, avatangiisinut inatsisinullu atuutsitsinermut naalakkersuisup, Mala Høy Kúkop, Sara Olsvigimut akissuteqaataanni takuneqarsinnaavoq.
Aamma atuaruk COP 21-imi isumaqatigiissutip nunatsinnut tunngasortaa misissorneqarpoq
Nunarput silap pissusia pillugu isumaqatigiissummut ilanngutissaguni CO2-mik aniasitsisarnermut annikillisaanerit pisarnermiit annertunerusumik nunatta CO2-mik aniasitsinerata annikillisarnissaanut pisussaaffeqalissaaq aammalu ukiut tallimakkaarlugit anguniakkanik saqqummiussisariaqartalerluni.