Silap pissusaata allanngorneratigut sunniutaasussat nassaarineqarput
- Sermersuup aakkiartoneratigut immat ilimagisamik sukkanerusumik qaffanissaat eqqartorneqartuarpoq. Immat qaffannissaat Kalaallit Nunaanni ernummatigineqassanngilaq.
Kalaallit Nunaani illoqarfiit qutsissumi inissisimapput. Sermersuaq aakkiartulerpat nunarsuup kujasinnerusortaani imaq qaffannerussaaq, Kalaallit Nunaata imartaani annikinnerussalluni, Søren Rysgaard oqarpoq.
Sermersuup nunamut naqitsinera sakkortoorujussuuvoq, sermersuarlu aappat Kalaallit Nunaat kivinneqassaaq.
- Sermersuaq aappat naqitsineerutissaaq nunalu annertuumik qaffalluni. Nunap qaffannera Uummannap eqqaani uuttortarneqarsinnaavoq. Soorunalimi siku aanniariartoq nuna ingerlaannaq qaffannavianngilaq, nuna inissinniaqqaartussaagami, Søren Rygsgaard oqarpoq.
Immat qaffannissaannut Kalaallit Nunaanni ernumassutissaqanngikkaluartoq silap pissussaata allanngorneratigut kingunerisassai allarpassuit piareersimaffigineqartussaapput.
- Tunup imartaani uumassullit pissuseqatigiinnerannut allannguutit takusimavagut, tassalu illeqqat kingunnit minnerusut nalinginnaasumik najortakkaminnit allamut nuussimapput, tassami avannarpasissuseq 75 gradi angullugu avannarparsimagamik. Immat naqqani uumaasut allat siornatigut takuneqarsimanngitsut naammattoorneqartalerput, kisiannili maannakkut oqarsinnaanngilagut sooq tamakkua takussaalersimanersut, Søren Rysgaard oqarpoq.
Taannalu oqarpoq silap pissusaata allanngorneratigut kingunerisaasa missisorneqarnissaat Kalaallit Nunaannut ajunnginnerpaassaaq.
- Silap Pissusianik ilisimatusarfimmi Pinngortitaleriffimmilu silap pissussaata allanngorneratigut kingunerisai paasiniarlugit sulivugut. Nunarsuarmi tamarmi ilisimatuussutsikkut attaveqaatit suleqatigilluinnarpagut. Sumiiffinni najugarisani assersuutinik sanasarpugut, assersuutigalugu Nuummi Maniitsumilu silap pissusaata allanngornerata kinguneriumaagassai pillugit siulittuisinnaavugut.
Sorpassuarnut pingaaruteqarput, aalisarneq kisiat eqqarsaatigineqarani, aammali maannakkut erngup nukinga atorlugu nukissiorfiliorneq pineqarpoq, Søren Rysgaard oqarpoq.
Nunatsinni Silap Pissusianik ilisimatusarfimmi suliat pillugit Søren Rysgaard Københavnimi silap pissusaa pillugu ataatsimeersuartoqarnerani ullumi saqqummiussivoq.