Silap pissusaata allanngorneranut meeqqat akiliuteqarnerpaassapput

Spaniamiut nalunaarusiaanni taama mianersoqqusisoqarpoq.

- Meeqqat nunarsuatsinni nunani piitsuunerpaani najugaqartut silap pissusaata allanngoriartorneranut akisussaasuunngillat. Taamaakkaluartoq taakkua sakkortunerpaamik eqqugaapput, taama oqarpoq, Spaniami meeqqanut suliniaqatigiiffiup, Save the Childrenip pisortaa Alberto Soteres.

Nalunaarusiami nutaami suliniaqatigiiffiup immikkut sammisai tassaapput, nunarpassuarni Afrikamiittuni Aasiamiittunilu meeqqat, silap pissusaata allanngorneranit eqqugaasut.

Nalunaarusiami oqaatigineqarpoq, piffissaagallartillugu iliuuseqartoqanngippat, meeqqat amerliartuinnartut panernersuarnit, qarsutsinersuarnit nappaatinillu toqussutaasartunit nalaanneqartalissasut.

- Nunat suliffissuaqarfiusut gassinik silaannarmik kissakkiartortitsisunik ukiuni hunnorujulikkaani mingutsitsereerput. Taamaattumik Københavnimi decembarimi nukittuumik pisussaaffiliisumik isumaqatigiissuteqarnissaq pisariaqarluinnarpoq. Aamma matumani nunat pisuut amerlasuunik aningaasaliisariaqarput, nunat ineriartortut silap pissusaata allanngoriartorneranut naleqqussarsinnaaniassammata, Alberto Soteres naggasiivoq.