Silap kiatsikkiartornera pakkersimaarniarlugu IA ilungersorneroqqusivoq

Inuit Ataqatigiit isumartik suli allanngortissimanngilaat. Kingusippallaamik iliuuseqarnialerpugut saqqummiussallu suunngippallaaqaat.

Nunarput iliuuseqarani eqqugaasutut imminut saqqummiuttuaannarsinnaanngilaq. Kyotomi isumaqatigiissummut atatillugu pisussaaffiliussani naammassiniartariaqarpai. Inuit Ataqatigiit oqaaseqartartuata, Naaja Nathanielsenip saqqummiussai taama naalisarneqarsinnaapput.

Gassinik silaannarmik kissakkiartortitsisartunik mingutsitsineq appartinniarlugu suliniutissanut pilersaarut, Naalakkersuisunit marsimi tusarniaatigineqartoq, Inatsisartunut ippassaq saqqummiunneqarami nassuiaatiinnanngorsimavoq, aalajangiiffiginagu tusaatissatut tigusassaq. Tassa Nassuiaat nalunaarsuiffiinnaavoq.

- Iliuusissanik malunnaatilinnik saqqummiiffiunngilaq, iliuusissatullu pilersaarutivittut taaneqarsinnaanani. Kisitsisinik ilaqarpoq, aatsaat maanna misissorneqalersunik. Tigussaanerusariaqaraluarpoq, iliuusissatsinnik tikkuaasinnaanngorluta, Naaja Nathanielsen oqarpoq.

Kyotomi isumaqatigiissut naapertorlugu Nunarput CO2-mik mingutsitsinerminik millilerissaaq, Nunatta 1990-imi aniatitai naleqqiukkaanni, taamanikkornit 8 procentimik aniatitakinerulertussaalluta. Tassa Nunarput tamatuminnga anguniagaqarniarluni iliuuseqassalluni danskit naalakkersuisuinut isumaqatigiissuteqarpoq.

- Tamatta ataasiakkaarluta iliuuseqarsinnaavugut. Silamut allanngoriartuutaasut pillugit iliuusissanut Naalakkersuisut pilersaarusiulerput. Assersuutigalugu akileraartarnermut atugarisaarnermullu ataatsimititaliaq silamut iluaqutaasunik iliuusissanik misissuissaaq, immaqalu biilit silamut ajoqutaangitsut akitsuutikinnerusinnaapput. Immaqa aamma nutaanngilisunik kissarsuutillit taarsiiniartut kaammattorlugit tapiiffigineqartarsinnaapput. Tassa akitsuutaannaat pinnagit aamma tapiissutitigut inuit silap pissusaanut iluaqutaasussanik iliuuseqalersinniarneqarsinnaapput, Naaja Nathanielsen oqarpoq. Taassumali nassuerutigaa, CO2-mik mingutsitsinermik millisaaneq akeqarmat.

- Kisianni aallartittariaqarpugut, silammi allanngoriartornera igalaakkut qiviarutta malinnaaffigisinnaavarput, Naaja Nathanielsen oqarpoq.