Silaannalunneq akisooq
Sulisut amerluutaat anersaartorniarnerminnilu ajornartorsiortarnerat sumit aallaveqarnersut sivisuumik paasiniarneqareersullu, natersuit aningaaseriviup qullersaqarfianiittut peqqutaasut paasineqarpoq.
- Tamanna suliffeqarfiup nalaassinnaasaanut ajornerpaanut ilaavoq. Sapinngisamik iliuuserisinnaasavut iliuuseravut, ajornartorsiutilli paasiniarneranut iliuuseqarnissattalu tungaanut piffissap taama sivisutigisup atorneqarnera naammaginanngeqaaq. Taamatummi pisoqarnerata nalaani sulisut amerluummik eksemimik anersaartuutikkullu ajornartorsiutinik peqqiilliuuteqarmata, Grønlandsbankimi allaffeqarfimmi pisortaq, aamma isumannaallisaanermut pisortaasoq Carsten Pedersen Sermitsiamut oqarpoq.
Aningaaserivimmi sulisut qullersaqarfittaamut nutsernerannit ukiut marluk qaangiuttullu natersuit piiarneqarput, tamanna koruuninik millioninik ataatsimik tallimallu akornanni aningaasartuutaavoq, taamatullu pisoqarnerata nalaani sulisunit 78-iusunit 37-t amerluuteqarnertik anersaartuutikkullu akornuteqanertik nalunaarutigaat, Grønlandsbanki taama ilisimatitsivoq.
Inimi silaannalunnerup kinguneranik, sulisut ilaat suli ajornartorsiuteqarput. Sulisut ilaasa akornutigiligaat suliffimminneersuusut akuersissutigineqareerput, taamalu taarsiiffigitillutik.
Aningaaseriviup nammineerluni aamma taarsiiffigitinnissaminik piumaqarnissani naatsorsuutigaa, kikkulli taarsiiffigitinnissamik piumasaqarfigineqassanersut nalunarallarpoq, tassa MT Højgaard imaluunniit natersualiorfik Interface Floor taarsiiffigeqquneqassanersut suli erseqqissumik aalajangiiffigineqanngimmat.
