Silaannaap kissatsikkaluttuinnarnera paasisitsiniutigineqassaaq
Ukiut 50-it, 70,-it sinnerlugilluunniit qaangiuppata issittumi silaannaq misinnartumik allanngortussaamat, oqartussaasut innuttaasullumi tamanna paasilluartariaqarmassuk paasititsiniaasoqalerpoq, novemberimi paasititsiniaasoqassalluni.
Tassani Danmarkimi avatangiisinut misissuiffik, DMU, Namminersornerullutik Oqartussani avatangiisinut pinngortitamullu pisortaqarfik, Dansk Polar Center Danmarkimilu pinngortitamut pisortaqarfik suleqatigiillutik paasititsiniaassapput.
Ukiut 50-it 70-it sinnerlugilluunniit qaangiuppata imaatigut inuussutissarsiutit allanngorsimassangatinneqarput, imaq kissarnerulerpat saarullineqqissasoq, kisiannili raajaqassuseq annikillissasoq paasititsiniaanissami ataqatigiisaarisoq Danmarkimi avatangiisinut misissuisoqarfinmeersoq Hans Meltofte oqarpoq.
Ukiut taaneqareersut qaangiuppata silaanaq imarlu kissarnerulerpat saarullik takkuteqqittussaavoq, akerlianillu raajaqarpallaarunnaasalluni, taamaammat inuussutissarsiutit allanngorsinnaanerat sillimaffigisariaqassasoq, ilisimatooq Hans Meltofte oqarpoq.
Tamanna ilutigalugu ukiuusarnera naanerulissammat kangerluit sikuusarnerat sivikinnerulertussaavoq, angallannikkullu periarfissaarnerulissasoq ilanngullugu ilimagineqarluni.
Tamanna aningaasarsiornikkut qanoq suniuteqassangatinneraa Hans Meltofte aperineqarami akivoq, pitsaaquteqarlunilu ajoquteqassasoq maannamut eqqoriarneqarsinnaasoq.
Kalaallit Nunaata nutaaliaasumik ingerlanissaanut iluaqutaasangatinneqarpoq, angallavigiuminarnerulissammat, avinngarusimasumilu piniartutut inuussutissarsiornermi akorngutaasinnaalluni piniariaatsit atoruinnaarsinnaamata, ilisimatooq Hans Meltofte oqarpoq.
Issittumi silaannaap allanngortussaanera pillugu paasititsiniaanermi naqitamik saqqummersitsisoqartusaavoq, TV-kut aallakaatitsisoqarluni, Nuumilu ataatsimeersuartoqassalluni.
