Sikorsuit kujataani nioqqutissanik assartuiniarnermut ajornartorsiortitsisut

- Nunatta kujataani pisisartutsinnut pissutsit soorunami ajuusaarnarput. Tamanna arlatsinnit naammagisimaarneqanngilaq. KIsianni nunami pinngortitaq pinngortitallu nukingi ulluinnarni sunniuteqangaatsiarfigisaani najugaqartugut uppernarsisariaqarparput.

Niuertarfinnut Pilersuisumut pisortaq, Brian Weuge Chemnitz oqarpoq.

Pinngortitammi nukingi ukioq manna sikorsuaqartitsingaatsiaqqipput, tamannalu suliffeqarfimmut pilersuisumut KNI-mut nunatta kujataani pisiniarfinni nioqqutissaqartitsiniarnermut unammillernartoqartitsingaatsiarpoq.

Unammillernartoq tamanna KNI-p ukiut tamaasa piareersarfigisaraluaraa, Brian Weuge Chemnitzip KNR-imut uppernarsarpaa.

- Kisianni ukioq manna aamma ilaatigut siorna sikorsuaqarnera sungiusimasatsinnit annertuneruvoq. Taamaattumik nioqqutissanik – pingaartumik najugaqarfinnut assartuinissamut allatut periarissarsiortariaqarpugut, Pilersuisuni pisortaq oqarpoq.

KNI aalisariummik Nanortalimmiit Aappilattumut nioqqutissanik assartuisinnaasumik qaammatini kingullerni pingasuni attartorpoq. Pilersuisullu najugaqarfinnut nioqqutissanik nutaanik assartuisitsinissaanut qulimiguulimmi inissaqartitsineq aamma killeqarpoq.

Uani umiatsiaaraq Nanortalimmit Narsarmijinut nioqqutissanik upernaaq assartuilersoq takuneqarsinnaavoq. Assi © : KNI

KNI tamatuma saniatigut najugaqarfinnut minnerusunut nioqqutissanik assartuinissamut umiatsiaaqqanik aamma attartorpoq. Ilaatigut Narsarmijinut, Brian Weuge Chemnitz paasissutissiivoq.

Taassuma KNI-p aalisariutinik attartornermut nioqqutissanillu qulimiguulimmik assartuisitsinermut pisiartut akiliutigisartagaanntu sunniuteqanngitsumik immikkut aningaasartuuteqarsimasoq erseqqissaatigaa.

Pisisartulli assigiinngisitaartunik qalipaaterpassuaqartunillu naliginnaasumik niuerniarsinnaanngillat.

KNI-p nioqqutissat nutaat nioqqutissallu sivikitsuinnarmik pigineqarsinnaasut pingaarnersiunnginnerullugit nioqqutissat pisariaqartinneqarnerpaat salliussimavai.

- Nioqqutissat pingaarnerit. Taratsut qasilitsullu, ullaakkorsiutit, arnap immuanut taarsiut, riisit, pastat, qillertuusallu, Brian Weuge Chemnitzip eqqaavai.

Nalinginnaasunngussanersoq

Brian Weuge Chemnitz KNI-mi ukiuni tallimanit arfinilinnut atorfeqarpoq, aamma nunatta kujataani najugaqarnikuuvoq. Taassuma aatsaat taama sikorsuaqartiginera nalaappaa.

Nunatta kujataani piniartup, KNR-ip juunip naanerani oqaloqatigisaata oqarnera naapertorlugu nunatta kujataani kangianilu ukiup taamaalinerani taama sikorsuaqartiginera nalinginnaanngilaq.

- Eqqaamavara 1970-ikkut aallartilaarnerani sikorsuit nunap isuaniit avammut 100 sømilit oqaatigaat isorartutigisut avammut. Tassa kingorna aatsaat taama aammalooqqilluni taama sikorsuaqartigeqqilerpoq, piniartoq Aappilattumeersoq, Hans Levisen oqarpoq.

Sikorsuit nunatta kujataanut ukioq manna februaarimili takkupput, taakkulu KNI-muinnaanngitsoq ilungersuatitsipput.

Sinersortaat Sarfaq Ittuk aamma umiarsuit takornariartaatit aamma ajornartorsiutigaat.

- Taamaammat nalinginnaanngitsoq oqaatigineqarsinnaavoq, pisortaq, Brian Weuge Chemnitz oqarpoq.

- Ataasiaannarluni taama pisoqarnersoq imaluunniit nalinginnaasunngornersoq piffissap takutikkumaarpaa.

Nunatta kujataata ilarujussua sikorsuarnit unguneqarsimasoq DMI-p qaammataasatigut nakkutilliissutaanit juulip ulluisa sisamaannit assimit takuneqarsinnaavoq. Assi © : DMI

Sikorsuit taamaannerat nalinginnaalissappat KNI piffissani sivisunerusuni umiarsuarnik assartuissutinik assartuisinnaanerup ilungersunartarnissaa piareersarfiginerusariaqassavaa.

Ukiunili kingullerni sikorsuaqarnerata annertussusaa tunngavigalugu KNI nioqqutissanik nalinginnaasunik naammattunik peqarnissaanut qulakkeeriniarnerusalerniarpoq.

- Sikorsuit januaarimi takkutinnginneranni nioqqutissanik amerlanerusunit inniminniinikkut piffissamut sivisunerusumut qulakkeerisassaagut.