SIK allamiut amerlinerat pillugu: Sulisitsisut nunaqavissut suliffissaaleqisut salliutinngilaat
Cafesorniartarfimmukaruit, neriniartarfimmukaruit hotelimukaruilluunniit sulisumit oqarfigineqassaatit: "Yes, can I help you?".
Ukiunimi kingullerni nunami allamiut nunatsinnut suliartortarut marloriaatinngorsimapput, pingaartumik suliffinni sulissussinerup iluani atuuttuni.
- Sumiiffiit ilaanni nassuerutigisariaqarparput sulisussaaleqigatta, taamaattuminguna pitsaanerpaajussagaluartoq sinerissami suliffissaaleqisut sulisussaaleqiffiusunut nuussinnaappata, SIK-p siulittaasua Jess G. Berthelsen KNR-mut taama oqarpoq.
Taassuma Tasiilaq assersuuteqarfigaa. Tasiilamimi suliffissaaleqisoqaqaaq, taamatuttaaq kujataani. Taamaammallu sulisitsisut tamakkunaniit tikisitsinerussagaluarput nunami allamiunut saaffiginninnginnerminni, SIK taama isumaqarpoq.
- Pingaaruteqarpoq siullertut tunumiit kujataaniillu sulisussarsiortoqaqqaartariaqaraluarpoq, ajoqutaali uaniippoq sumiiffinni pineqartuni aamma inissaaleqineq atuummat, Jess G. Berthelsen oqarpoq.
Tasiilami suliffissaaleqisut 7 procentiupput
Kommuneqarfik Sermersooq naapertorlugu Tasiilami inuit 2000-t missaat najugaqarput, taakkunanngalu inuit 84-t suliffissaaleqisutut Naatsorsueqqissaartarfiup kisitsisaataanni allassimapput, tassalu procentinngoraanni taanna 7 procentiuvoq.
Nunami allamiut suminngaanneerpat?
- Inuit 486-t Filippinerineersuupput
- Inuit 249-t Thailandimeersuupput
- Inuit 128-t Islandimeersuupput
- Inuit 80-t Kinameersuupput
- Inuit 80-t Polenimeersuupput
Aallerfik: Nunatsinni naatsorsueqqissaartarfik
Kommune Kujalleq naapertorlugu Narsami sulisinnaasut 839-iupput taakkunanngalu inuit 41-t suliffissaaleqisutut allassimapput, tassalu imaappoq 4,1 procentii suliffissaaleqisuupput.
Nunami allamiut akissarsianut appasitseqataapput
Jess G. Berthelsen isumaqarpoq, nunami allamiut nunatsinniinnerat akissarsianut appasitsitsisut, taakkumi nunaqavissunut sanilliullutik akissarsiakinnerupput.
- Ajornartorsiut uaniippoq, ukiuni kingullerni sulisinnaassuseq unammillerneqanngimmat, ajornanngitsuaqqamillu allamiunik tikisitsinniinnartarput, assersuutigalugu aalisakkerivinni, taamaalillutik akissarsiat aamma qaffakkiartunngillat, taanna oqarpoq.
AAMMA ATUARUK Kangiamiut nunatsinniittut: Allamiuunerput tunngavigalugu nikassagaanngilagut
- Taamaalillutik akissarsiat aamma qaffakkiartunngillat, Uummannami aalisakkeriviit qiviarutsigit takusinnaavarput unammillerneq qaffasittoq, taamaammallu aalisakkap akianut aamma tuppoq, avataaniimmi tikisitsiinnartarneq ajornanngingaarmat akissarsiat taamaalillutik aamma aalisakkerivinni qaffakkiartunngillat, oqarpoq.
Ullumikkut nunatsinni nunami allamiut 1860-t najugaqarput, taakkunannga 61-t Nuummi najugaqarput sinnerilu sinerissami siarunarsimapput.