SIK: Suliffissanik nutaanik pilersitsisoqarli
-Ilaasortavut suliffissaaleqinermik annertuumik eqqorneqarsimapput, naak qinikkat ilaasa oqariartuutiginiartaraluaraat suliffissaaleqisut ilaat suliumanngitsut uffalu taamaattoqanngilluinnartoq. Ilaasortarpassuavut qanorluunnit suliffissarsiortigigaluarunik suliffissaqanngillat, taamaattumik nikassarlugillusooq oqariartortoqartarnera unitsilluinnarneqartariaqarpoq piffissarlu tassunga atorunnaarlugu suliffinnik ataavartunik pilersitsiniarnermut atorneqarniarli, Jess G. Berthelsen oqarpoq.
Aamma oqarpoq inuussutissarsiutinik allanik pilersitsiniarnermi assersuutigalugu aalisakkat raajallu aatsaat piareerlugit nunatsinnit anninneqarsinnaalernissaat, islandimiut isumassarsiorfigalugit takornariaqarnerup aallunneqarnerulernissaa kiisalu aatsitassarsiornerup sukkanerusumik aallartinneqarnissaa allallu sulissutigineqartariaqartut.
-Sanaartornermut Aserfallatsaaliinermullu Aningaasaateqarfik imaqarluarpoq, neriuppungalu 176 million koruunit suliffissaqartitsiniarnermut atugassatut qinnuteqaatigineqartut iluatsinneqarumaartut. Aningaasat amerlanerusut suliffissaaleqinerup akiorniarneqarneranut atorneqartariaqaraluarput, tassami suliffissaaleqineq inuiaqatigiinnut inummullu pineqartumut peqqinnartuunngilaq. Taamaattumik aatsitassarsiorneq sukkanerusumik aallartinneqartariaqarpoq.
SIK-p siulittaasua aamma isumaqarpoq aningaasanut inatsisiliornermi eqaannerusumik aaqqiisoqartalertariaqartoq, amigartooruteqarlunilu pilersaarusiortoqarsinnaanissaa periarfissatut tikkuarpaa.
-Ukiunut tulliuttunut marlunnut pingasunulluunnit amigartoorluni pilersaarusiornissaq imminermini ajunngilaq, nunatta karsianut qulakkeersinnaagaanni ukiut sisamassaanni imminut nammattumik ingerlatitsisoqarsinnaanera. Tassami pissusissamisuunngilaq innuttaasut suliffissaqartinneqassanngippata aningaasatigullu pitsaanngitsumik inissisimatitsisoqassappa illuatungaanilu nunatta karsia nammaqatigiittumik ingerlassappat.
