SIK: Pisortat suliffeqarfinnik piginnittuusariaqarput
Naalakkersuisut siulittaasuata Kuupik Kleistip, Namminersorlutik Oqartussat suliffeqarfiutaasa namminersortunut tunineqarnissaannik oqalunnera, Sulinermik Inuussutissarsiutillit Kattuffianni siulittaasup Jess G. Berthelsenip akerleraa.
Allattoq Else Løvstrøm
septembarip 23-at 2009 11:10
Jess. G Berthelsen isumaqarpoq suliffeqarfiit pisortanit pigineqartut namminersortunut tunineqartarnerat inuiaqatigiinnut kalaallinut iluaqutaasimanngitsoq.
Suliffeqarfissuarnik pisortat pigisaannik namminersortunut tunisineq innuttaasut nunaqarfinniit illoqarfinnut nutserarnerannik kinguneqaannassaaq, SIK-p siulittaasua isumaqarpoq.
Pisortat suliffeqarfiutaasa namminersortunut tunineqarnerisa kingunerannik suliffeqarfinni taakkunani atorfillit, avataaninngaanniit tikisitat, amerleriaannarsimasut, Jess G. Berthelsen aamma isumaqarpoq.
- Inuiaqatigiit taama siammasitsigisumi najugaqarnerat akuersaassagutsigu aamma pisortat suliffeqarfinnik piginnittuusarnerat akuerisariaqarparput, SIK-p siulittaasua Jess G. Berthelsen oqarpoq.
