Mittarfissat: SIK-p nunami allamiunik sulisoqarnissaa ernumanartoqartikkaa
Sulisitsisut neqeroortitsisoqarnissaanut isummertoqalereernissaa siusippallaarsoraat, ilaasortatilli isumagineqarnissaat kissaatiginerullu erseqqissaatigaat.
- Kalaallit suliffeqarfiutaasa sananissamut ilaatinneqarnissaat taperserparput, GE-mi inatsisilerinermut siunnersorti, Lars Krogsgaard-Jensen oqarpoq.
Mittarfinnik sanaartortitsinissap nunat tamalaat akornanni neqeroortitsissutigineqarnissaa naatsorsuutigineqartoq, Aqqaluaq B. Egede, Randi Vestergaard Evaldsenip paragraf 37-mut apeqquteqarneranut akissuteqarluni allappoq.
AAMMA ATUARUK Mittarfiit allamiunik sulisoqarluni sanaartorneqassasut
Sulisitsisulli Naalakkersuisut nunani allamiunit taamaallaat sulisoqarusunneratut tamanna paasivaat.
- Taanna partiialuunniit oqaaseqartinngikkaluarlugit, taanna, IA Naalakkersuisulluunniit tamarmik nunami allamiunik pisariaqanngitsumik sulisoqarusuppata tamanna uissuummissutigissaqaara.
AAMMA ATUARUK Suliffissarsiortut eqqornerusumik nalunaarsorneqartalerlik
Sulisartut Kattuffiata Aqqaluaq B. Egedep nalunaaruteqarnera, kalaallit inuiaqatigiit sanaartornermit iluanaaruteqarnavianngitsutut isumaqarsinnaanera ernumanartoqartippaa.
- Mittarfinnik sanaartortoqalerpat tamanna nunatsinni suliffissaqartitsillunilu iluaqutissartaqartariaqassaaq, SIK-p siulittaasua, Jess G. Berthelsen oqarpoq.
Nunarpulli pilersaarutinut, mittarfiit tallineqarnissaannut Nuullu ineriartortinneqarnissaanut naammattunik sulisussaqanngitsoq, Nationalbankenip aggustimi nalunaarutigaa.
AAMMA ATUARUK Sanaartorujussuarneq akisunaarneqarlunilu kinguaattoorutaasinnaasoq
Mittarfiit ataasiakkaarluit sananeqarlik
Aningaasaqarnermulli Naalakkersuisoq naapertorlugu ajornartorsiutaasoq taanna, mittarfiit sanaartornissaannut nunat tamalaat akornanni neqeroortitsinikkut nunanilu allamiunik sulisoqangaatsiarnikkut naammassineqarsinnaavoq.
SIK-lu naapertorlugu mittarfiit pingasut ataatsikkut suliarineqarnissaata taamaatiinnarneqarneratigut tamanna avaqqunneqarsinnaavoq.
- Mittarfiup ataatsip sananeqareerneratigut sunniutaasup qanoq annertutiginera takussavarput. Mittarfiillu allat marluk sananeqarnissaasa aallartinnissaannut piffissaanersoq tamatuma kingornatigut takuneqassaaq, Jess G. Berthelsen oqarpoq.