SIK-p KNI-llu isumaqatigiissutaanni Socialfond ilaavoq

- Nunatsinni minnerunngitsumik kræftimik nappaatillit ukiuni kingullerni amerliartorput. Aamma sinerissamiit napparsimmavissualiarlutik Nuummukartariaqartartut Danmarkiliartariaqariartulluunniit

amerliartorput. Taamaattumik isumaqarpunga, arlaatigut iliuuseqarnissamut piffissanngortoq, qujanartumillu KNI-lu isumaqatigiilluta taanna aaqqiivigisinnaasimavarput, Jess G. Berthelsen ima oqarpoq.

Assersuutigalugu KNI-mi sulisut, SIK-mi ilaasortat ilaat, Nuummukassatillutik ullut 15-it sinnerlugit peqanngissagaluarpata, inigisaanut, aningaasarsiatigut annaasassaanut allatigullu ikiorserneqarnissaannut aningaasat atorneqartassapput. Aningaasaateqarfik aningaasarsianut nakkartitassaagaluit ilaat atorlugit aningaasalersorneqassaaq.

Jess G. Berthelsen-p qularutiginngilaa, sulisitsisunut allanut isumaqatigiinniarnissani tullinnguukkumaartuni assigusumik isumaqatigiissuteqarnissaq piumasaqaatasasoq.

- Siulersuisuunernit taanna qaqinneqarumaartoq qularutiginngilara, allanut taama isumaqatigiissuteqarnissaaq piumasarineqarluni, SIK-p siulittasua oqarpoq.

Kalaalit Nunaanni Sulisitsisut Peqatigiifftata, GA-p, isumaqatigiissutip qanoq ittuunera sukumiisumik suli misissorsimanngilaa. GA-p pisortaa Henrik Leth oqarpoq, isumaqatigiinniarnerni tullerni socialfondiliornissaq SIK-ip piumasarissappagu, isumaqatigiissutissap tamakkiisup ilagisinnaanera, GA-p misissorumaaraa.

- Tassami aalaakkaanerusunik iluarisimaarinninnerusunillu sulisoqalernermik tamanna kinguneqassappat, taava ilaasortavut naammassisaqarnerulissapput. Kisianni soorunami isumaqatigiinniarnerni tamani isumaqatigiinniutigineqartut tamakkerlutik qanoq naleqassanersut isiginiarneqartarput, Henrik Leth oqarpoq.

GA-p ilaasortaani suliffillit SIK-mut ilaasortaasut ilaquttaminnik napparsimasoqartillugu illoqarfimmut allamut angalanissaat sulisutsisunuit maanna akilerneqartarput.