SIK-p Alcoa oqaloqatiginiarpaa
Nalunaarusiaq taanna 2007-imi suliarineqarpoq. Nalunaarusiaq Sulinermik Inuussutissarsiuteqartut Kattuffiannit SIK-mit tupaallaatigineqarpoq. Pisinnaatitaaffiit Kalaallit Nunaannilu inatsisit maleruarneqarnissaat pillugit SIKp Alcoa oqaloqatiginiarpaa. Honduras-imi Alcoap alumiiniumik aatsitsiviani sulisut naqisimaneqarnerat akiluttortitaanerallu SIK-imit tupaallaatigilaarneqarpoq, taamaakkaluartoq SIK-ip pingaartippaa Kalaallit Nunaanni alumiiniumik aatsitsivimmik pilersitsisoqassasoq, suliffeqarfik taamatut ittoq ukiorpassuarni suliffeqarfiusinnaammat, suliffinnillu amerlasuunik sulisoqarsinnaalluni. Jess G Berthelsen oqarpoq. Kalaallit Nunaanni inatsisit isumaqatigiissutillu malillugit, aammalu inuit pisinnaatitaaffii pillugit maleruagassat malinneqarnissaat SIK-mit piumasarineqarpoq. Islandimi sulisartut kattuffiat Alcoa-mik isumaqatigiissuteqarpoq, tassunga ilanngunneqarlutik malinneqarlutillu sulisartut pisinnaatitaafii, tamakkualu Kalaallit Nunaanni aamma atuutsinneqarnissaat pillugit SIK-ip Alcoa oqaloqateqarniarpoq. Alcoap suliai aningaasaqarneralu pillugit suliffeqarfik Greenland Development Naalakkersuisunut ingerlatitseqqiisartuuvuq, Alcoalu pillugit nalunaarusiaq Greenland Developmentimit ukioq 2007-imili ilisimaneqarpoq. Nalunaasiaq pillugu SIK-ip isumakuluteqarnera Greenland Developmentip pisortaanit Flemming Drechselimit paasilluarneqarpoq. Nalunaarusiami saqqummiunneqartut aallaavigineqarpata, SIK-ip isumakuluuteqarnera paasisinnaalluarpara. Nalunaarusiaq ukiut pingasut matuma siornatigut suliarineqarpoq, tamatuma kingorna allanik pisoqarsimavoq. Nalunaarusiami saqqumminneqartut paasiniarlugit SIK-ip Alcoamik attaveqarniarnera ajunngitsutut isigineqartariaqarpoq, Flemming Drechsel oqarpoq. Alcoap suliffeqarfiutini Honduraimiittoq allamut tunisimavaa, taamaakkaluartorli, Greenland Developmentip aalajangiusimavaa, suliffeqarfiup Hondurasimiittup tunineqannginnerani sulisut atugaasa ajortut aaqqiivigisimassagaat.
