SIK: Naalakkersuisut kalaallisut oqalussinnaasariaqarput
Jess G. Berthelsenip naalakkersuisussatut siunnersuutigineqartut marluk kalaallisut oqaaseqannginnerat sakkortuumik uparuarpaa, oqarluni Namminersorneq pillugu taasisitsinermi kalaallit oqaasiisa pingaarnerpaajunissaat oqariartuutigineqareersoq.
- Kalaaliunersut kalaaliunnginnersulluunniit, kinamiuunersut australiamiuunersulluunniit uanga soqutiginnilara. Isumaqarpunga naalakkersuisunngortitsinermi pingaaruteqartoq oqaatsitsinnik atuisinnaasumik naalakkersuisunut ivertitsinissaq.
Aamma SIK-p tulluartinngilaa taamatut oqaatsigut salliutillugit atorneqarnissaannut Namminersornermut atatillugu oqariartuuteqariarluta taama oqaatsitsinnik atuisinnaanngitsunik naalakkersuisunut ivertitsisoqalernera.
Taamaakkaluartoq SIK-mit kissaatigineqanngilaq Ilaqutariinnut Naalakkersuisunngortussaq Maliina Abelsen aamma Aningaasaqarnermut Naalakkersuisoq Palle Christiansen kalaallisut oqaluttunik taarserneqassasut.
- Naluara oqartoqarsinnaanersoq kalaallisut oqaasilinnik taarserneqarnissaat kissaatigigipput, kisianni SIK isumaqarpoq pissusissamisuunngitsoq taamatut ulluinnarni sullitassat oqaloqatigisinnaanagit qanimut naalakkersuisutut inissisimaneq, SIK-p siulittaasua Jess G. Berthelsen oqarpoq.
