SIK Alcoa pillugu nukittuniaannarpoq

Maniitsup eqqaani aluminiumik aatsitsivissualiortoqassappat, avataaniit suliartortut kalaallinit aningaasarsiakinnerussanngitsut SIK-mit Sulisitsisut peqatigiiffianniillu suli piumasarineqartuarsinnarpoq, naak Alcoa siorasaarigaluartoq avataaniit aatsitsivissuarmut suliartortut aningaasarsiakinnerunngippata aatsitsiviliornissartik orniginartikkunnaarsinnaallugu.
februaarip 25-at 2011 15:47

- Taanna akuerisinnaanngilarput, peqqutigalugu akuersaassagutsigu taava qularutiginngilarput, sulisitsisut tullii uagutsinnut isumaqatiginniannialerunik aamma kissaatigissagaat taakkutulli pineqarnissartik. Taava nunatsinni aningaasarsiaqartitsineq sequtserlugu aallartissavarput, tamannalu akersaarsinnaangilarput, Jess G. Berthelsen oqarpoq.

Ullup qeqqanut radioaviiseqarnitsinni Aatsitassaqarnermut Naalakkersuisoq Ove Karl Berthelsen oqarpoq, Maniitsup eqqaani aatsitsivissuarmut nunanit allanit suliartortut, kalaallinit aningaasarsiakinnerusinnaannissaat suli aaliangiiffigineqanngitsoq, taamaalillunilu Alcoa utaqqikatalluinnalerluni.

Ove Karl Berthelsen ullup qeqqanut radiaviisimut ima oqarpoq.

- Tusaasinnaasarput paasisinnaasarpullu malillugu, Alcoa ima oqariartuuteqarpoq Alcoa pillugu isummertoqanngippat taava ajunnginnerutinneqartoq pilersaarut unitsinneqaannaruni. Tassani pineqarpoq, avataaninngaaniit suliartorallartussat pillugit nunatsinniit isummertoqarnissaa, Ove karl Berthelsen taama oqarpoq.

Maniitsup eqqaani aatsitsivissualiortoqassagaluarpat sulisullu avataaneesut kalaallinit aningaasarsiakinnerullutik SIK-p siulittaasuanit Jess G. Berthelsenimit annilaangarnartoqartinneqarpoq.

- Tupinnanngitsumik suliffeqarfiit Kinamiit SIK malillugu aningaasarsiaqanngitsunik tikisitserusulissapput, taamaalillunilu nunaqavissut sulisorineqarunnaarlutik, SIK-p siulittaasua Jess G. Berthelsen taama oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq