SIK aamma NuSuKa immikkut ittumik isumaqatigiissusiorsinnaanissaq apeqquserpaat

SIK-p siulittaasuata Jess G. Berthelsenip tamanna aarlerinartoqartippaa:

- Alcoa immikkut akuersissummik tunissagutsigu, taava aatsitassarsiorniartut allat soorunami aamma aperissapput Alcoa taamatut immikkut ittumik tunineqarsinnaappat immikkut akuersissummik uagut sooq tunineqarsinnaanngilagut? Jess G. Berthelsen oqarpoq.

Aluminiumik aatsitsivimmik sanaartornermi sulisussat ukiualuinnaat Nunatsinniittussaanerat eqqarsaatigalugu immikkut ittumik isumaqatigiissusiortoqarsinnaanissaa Naalakkersuisut oqallisigeqquaat, SIK-p tamanna pissusissamisoorsorinngilaa:

- Sivikitsuinnarmik maaniittussanik sanaartornermi ajoraluartumik tikisitsisoqartarpoq, sulisitsisullu sanaartorneq ingerlatinniarlugu qularnanngitsumik qinnuteqassapput nunanit allanit tikisitsisinnaanissamut. Taamaattoqassappallu uagut unammillersinnaajunnaassaagut, Jess G. Berthelsen oqarpoq.

Nunaqavissut Suliffiutillit Kattuffiata, NuSuKa-p, SIK tapersersorpaa, suliffeqarfiillu nunatsinneersut sanaartornerup nalaani salliutinneqarnissaat pingaartillugu.

Sanaartornermi sulisussat immikkut ittumik isumaqatigiissusiorfigineqarsinnaanissaat Naalakkersuisut ammaffigaattaaq, tamannalu pillugu oqallittoqartariaqarsoralugu.

Immikkut ittumik aaqqiisoqarsinnaanissaa Nusukap illuatungilerpaa:

- Sulisartut eqqarsaatigalugit SIK isumaqatigivarput. Imaanngilaq sulisartut avataaninngaanniit eqquteriarlugit inussiaatitut akilersussagaat, taamaammat SIK tapersersorparput, Nusukap siulittaasua Gerth B. Lynge oqarpoq.

Nunaminertaq sanaartorfiusussaq Alcoap aamma akilertariaqarpaa, Gerth B. Lynge oqarpoq:

- Alcoa Islandimi sanaartulerami nunaminertaq pisiarivaa, paasisavut malillugit 220 millionit koruunilerlugit nunalu maani akeqanngitsumik tigusussaallugu, taamaattumik nunaminertaq sanaartorfiusussaq attartornermi Nunatsinnut arlaatigut naleqartinneqarsinnaappat, Nunatta aningaasaqarniarneranut assut iluassagaluarpoq,

Nusukap siulittaasua Gerth B. Lynge oqarpoq.

Kalaallit Nunaanni Sulisitsisut Peqatigiiffiat GA oqaaseqartinniaraluaratsigu iluatsinngilarput.