Siggarta anisitaavoq

Kalaallit Nunaanni Assammik Arsartartut Kattuffiata GHF-ip aamma dommerit peqatigiiffiata Siggartap isumaqatigiinnerat pisutigalugu dommerinik ineriartortitsineq GHFip akisussaaffigilerpaa. Tamanna aalajangiunneqarpoq GHF ileqquusuik ataatsimeersuarmat arfininngorneq apriilip 21-at.

Dommerit arfinillit Danmarkimeersut aamma kalaallit dommerit marluk BankNordik GM-mi Ilulissani unammersuarnermi dommeriupput. Siggarta aamma GHF nutaamik isumaqatigiissusiorsinnaasimanngillat.

- Assut uggornarpoq kalaallit dommerit atorneqanngimmata. Neriuutigeqaarput tamakku inissilluarumaartut, SAK-meersoq Frank Lundblad GHF-ip ataatsimeersuarnerani oqarpoq.

Dommerilli GHF-illu piumasaat imminnut ungasippallaarmata GHF aalajangerpoq dommerit akisussaaffigilerniarlugit. GM sioqqullugu dommerit marlukkaarlutik ineqartinneqarnissartik naaggaarsimavaat tamarmik immikkut ineqarumallutik aaqqissuisut Nagdlúnguak piumaffigisimallugit aammalumi taamatut neqeroorfigineqarsimallutik. Akissarsialli pillugit piumasat isumaqatigiissutaasimanngillat taamaammat nutaamik isumaqatigiissusiortoqanngilaq.

Dommerit ataasiuttakkani ineqarumasimapput qasuerluarsimallutik unamminerit aqussinnaajumallugit.

- Unamminerit tamaasa dommerit annertuumik piumaffigineqartarput taamaammat unnuami sinilluarsimanissaq pisariaqarpoq, dommeri Hans Lyberth GHFip ataatsimeersuarnerani dommerit sinnerlugit peqataasoq oqarpoq.

Nassuiaalli taanna klubbinit ilalerneqanngilaq.

- Inui 18-20-ikkaarluta natermi madrasseliinnarluta festsaalini sinittarpugut feeriagullu atorlugit assammik arsarnermi GM-riartarluta ilaatigullu feeria nammineq akilertarlugu. Tamakku tamaasa ingerlattarpagut nammineq piumassutsimik, Elise Bruun NÛK-meersoq aamma GHF-ip siulersuisuini ilaasortaq oqarpoq.

Siunnersuut taasisinnaallutik najuuttut 14-it tamarmik akueraat.

Dommerit Hans Lyberth aamma Bent Sørensen GHF-mi siulersuisuni ilaasortanngorput. Dommerinik ilitsersuisartut Jens Henriksen aamma Jørgen Svane akuersereersimapput pissartanngorniunnernut takkuttarniarlutik aammalu pikkorissaasarniarlutik.

Dommerit piginnaasatik najoqqutaralugit maanna agguataarneqassapput A, B aamma C-mut.

GHF-ip siulersuisortaavi tassaapput:
Siulittaasoq: Boas Møller
Siulersuisuni ilaasortat: Lars Dahl, Elise Bruun, Lena Ravn Davidsen, Hans Lyberth, Bent Sørensen aamma Tom Ostermann Søholm.

Siulersuisut suli inissitsitinngillat.