Sialuit qulimiguullillu nunamik ikuallattumik qamisaataaqataapput

Sisimiut avannaata kangiani nunap ikuallannersua siallerneratigut Air Greenlandillu helikopterianit qatserisoqarneratigut millissinneqarpoq.

Ikuallattoq ussissorujussuarmik pujuliormat qatserisartut nammineerlutik qamisaasinnaasimanngimmata, Sisimiuni upalungaarsimasut Air Greenlandip helikopterianit ikiorneqarnissamik noqqaassuteqarnikuuput.

Air Greenlandip helikopteria ippassaq ualikkut unnukkullu ikuallattumik qamisaavoq. 

- Helikopterimit qatserisoqarnerta kingorna ikuallattup avannamut kangimullu siaruaanissaa pinngitsoortinneqarpoq, ulapungaarsimasut pisortaat Ole Kreutzmann oqarpoq.

AAMMA ATUARUK Qatserisartut Air Greenlandimit ikiorneqarnissamik noqqaapput

Ikuallattoq maanna pujuliornerujussuarunnaarpoq, qatserisartullu qamisarsinnaalerpaat, Ole Kreutzmann oqarpoq.

Maanna sakkortuumik anorlerpoq, anorlerunnaarpallu qatserisartut qamisaanertik nangissavaat. 

Tamatuma kingorna helikopteri suli atorfissaqartinnerlugu Sisimiuni upalungaarsimasuutitat aalajangissavaat,Ole Kreutzmann oqaluttuarpoq.

Pujoorivimmit ikuallattoqarneratigut ikuallattoq siaruaappoq. 

Pujoorivik nakkutigineqarsimagaluarpoq, ikuallannerli nunamut panertumut anngukkami siaruaatipallassimavoq.