Video: Qatserisartut Air Greenlandimit ikiorneqarnissamik noqqaapput
Pujoq nunap ikuallattup Kangerluarsuk Tulliup qinnguata eqqaaniittoq, ussingaarmat qatserisartut qatseruserlutik ikuallattumut qanillisinnaanngillat.
Ikuallattoq pujuliungarmat, Sisimiuni upalungaarsimasut maanna Air Greenlandip qulimiguuinik ikiorneqarsinnaanerlutik misissuipput.
Taama Sisimiuni upalungaarsimasut pisortaat Ole Kreuzmann paasissutissiivoq.
Qulimiguulimmit ikuallattoq kvadratkilometerit pingasutut annertutigisoq qulaavaallugu qaminneqasssaaq.
AAMMA ATUARUK Sisimiut avannaani nuna annertuumik ikuallattoq qamikkuminaatsinneqarpoq
- Ikuallattoq illuaqqanut ikuallattup qanittuaniittunut ulorianartorsiortitsinngilaq, anorili allamut saappat, pujoq Sisimiunut anngussinnaavoq, anersaartorniarnermikkullu akornuteqartunut tamanna ajornartorsiortitsissaaq, Ole Kreuzmann oqarpoq.
Ikuallanneq annertooq tamatumalu pululiornera 2500 gange 1500 meterisut annertutigivoq.
Kangerluarsuup Tulliata qinnguanit Eqalugaarniarfimmut pisuttoqannginnissaa upalungaarsimasuutitat innersuussutiginngilaat.
Ikuallanneq pujoorivimmit aallartippoq. Pujoorivik nakkutigineqaannavissimagaluarpoq, innerli siaruaammat ikuallannera nunamut panertumut siaruaatipallappoq.
