Shellip issittumi uuliasiorluni qilleriniarnera Obamamit akuersissutigineqartoq

USA-p præsidentia Obama, aggustip naalernerani Alaskamut siullerpaamik tikeraarniarluni nalunaarteqaqqammertoq, Shellip Issittumi uuliasiorluni aallarniutaasumik qillerisinnaaneranik akuersissuteqaqqammerpoq.
Allattoq Karsten Sommer
juulip 24-at 2015 09:38
Nutserisoq Simon Uldum -

Shellip sikunik aserorterutaata Fennicap sapaatit-akunneri marluk matuma siorna ikkarlilluni saneraatigut meterimik takitigisumik putunerata kingorna taama nalunaaruteqarpoq. Sikunik aserorterutip sumiiffigisaani Shellip qillerivia Kulluk 2012-imi ajutoorujussuangajappoq, silarluttorsuugaa immap naqqanit kaanngarluni malissuarni aqutassaajunnaaraluarmat.

Shellip isumannaallisaanermi maleruaqqusanik arlaleriarluni unioqqutitsisarsimanera USA-mi nunanut allanut tunngasunut ministereqarfiup sakkortuumik isornartorsioraluarpaa, maannali tassa uuliasioqatigiiffiup oqallisaaqisup qillerinernik ingerlatseqqinnissaa Obamamit ammaanneqarpoq.

AAMMA ATUARUK Shellip misileraalluni qilleriniarnera Inuppiaat isumaqatigiinngissutigigaat

- Obamap nunarsuarmi silap pissusianik ilungersuuteqarnermi ataqqineqarluni eqqaamaneqarnissaminik kissaateqarneranut tamanna naapertuutinngilaq, Sune Scheller, Greenpeacemi suliniutinik aqutsisoq taama oqarpoq.

Obamalli naalakkersuisui Shellip aallarniutaasumik qillerinissaanut taamaallaat akuersissuteqarput, sikunik aserorterutip ajutooqqasup suliarineqarnerata nalaani immap naqqata ikiariissitaarnerini uuliaqarfiusinnaasut anguneqarsinnaassanatik.

- Taamaammat Shellip Alaskap avataani immap naqqani qillerinissamik inaarutaasumik qinnuteqaateqarnissaani itigartitsinissamut præsident Obama suli periarfissaqarpoq, Sune Scheller Greenpeacemeersoq taama oqarpoq.