Shellip misileraalluni qilleriniarnera Inuppiaat isumaqatigiinngissutigigaat
Alaskami Barrowimi inuppiaat juunimi juulimilu sapaatit-akunnerini kingullerni arfanniarneq nalliussillugu ileqquusumik ukiumoortumillu nuannapput mattattuullutik qittallutillu. Nalliuttorsiorneq taanna Nalukatammik taaguuteqartippaat.
Nuannannerlu qaangiuppoq, ernumanermillu assortuunnermillu maanna taarserneqarluni.
Inuppiaat 4700-it missaanniittut Barrowimi najugaqarput, arfanniutillu arfineq-pingasut uuliasioqatigiiffiup Shellip misileraalluni qilleriffiginiagaata ungasinngisaaniillutik.
Tamannalu Barrowimi innuttaasorpassuit ernumanartoqartippaat.
AAMMA ATUARUK Shell issittumi uuliasiornialerpoq
Taakkumi isumaqarput Shellip sumiiffimmi tassani qilleriviinit marluusunit uuliamik kuseriarninnguamik ataatsimiilluunniit mingutsitsisoqassagaluarpat arferit sumiiffimmit qimaguteratarsinnaassasut. Tamannalu ajorluinnartumik kinguneqassaaq arfanniarneq inuppiaat inuunerannut ileqqutoqaannullu pingaaruteqarluinnartuummat.
Inuppiaalli ilaat allatut aamma isumaqarput.
Assersuutigalugu arfanniummi naalagaq Jake Adams, Barrowimi ilaqutariit nuimanerit ilaanneersoq.
Taanna, aviisi Alaska Dispatch naapertorlugu isumaqarpoq uuliasiorluni qillernerit ineriartornermik pitsaasumik nassataqassasut, tamanna Barrowimi aningaasanik kaaviiaartitsinermik nutaamik pilersitsissammat.
Jake Adams aviisimi Arctic Sounderimi allappoq maannakkut pissutsit inissisimanerini ajornerpaaq tassaasoq Barrowimi taama sakkortutigisumik isumaqatigiinngissuteqartoqarnera.