SF Danmarkimi naalakkersuisooqataajunnaarpoq
Villy Søvndal 2010-mi partiimik annaassisutut nipilersortartutullu tusaamasarsuartullusooq inissimareernerani partii tapersersorneerukkaluttuinnarsimavoq. Kingornatigummi siulittaasunngorniuttoqarnera sakkortusimaqaaq aammalu anguniakkat arlalissuit naammassineqanngitsoorlutik. Partii qinersisartuminit tununneqarnerata annertussusaa partiini allani takuneqarsimanngitsoq pisimavoq, kingullermillu uuliasioqatigiiffiup DONG-ip tallimararterutaata tunineqarnissaa pillugu partiip tungaanit qanoq taasissutigineqassanersoq isumaqatigiinngissutigineqarluni. Kingullerpiarlumi pissutigalugu partii ajutuuissorpoq.
Partiip siulersuisuuneri pissaanilissuit pingasunngormat unnukkut ataatsimiipput, siulittaasullu Anette Vilhelmsenip DONG-imut piginneqataassutinik Goldmann Sachsimut tunisinissaq pillugu akuersilluni taasinissamut pilersaarutai tapersersorneqartutut isikkoqaraluarput, kingornali Folketingimut ilaasortaatit aamma ataatsimiipput, tassanilu tapersersorneqarpianngilaq. Folketingimilu ilaasortaatit ullaap tungaani ataatsimiimmata SF-ip naalakkersuisooqataanera tamaanga killeqartinneqarpoq.
Ataatsimiinnermimi aalajangerneqarpoq SF-ip Det Radikale Venstremik Socialdemokraatinillu naalakkersuisooqataanermit tunuassasoq. Partiit naalakkersuisooqataasut marluk ingerlaqqiinnassapput SF-ilu illuatungiuliuttunngorluni.
