Serminik iigartartunik ilisimatusartoq Ujarassiuumut nersornaammik tunineqartoq
Timmisartumit assilisatoqqat atorlugit Nunatsinni Skandinaviamilu sermit iigartartut oqaluttuarisaanerannik nalunaarsuinermik annertuumik suliaqarsimanini nersorneqaatigaa.
Dansk Geologisk Forening tusagassiorfinnut nalunaaruteqarluni taama allappoq.
- Kurt H. Kjærip Kalaallit Nunaanni timmisartumit assilisatoqqat periarfissaqarluarnerat takusinnaasimavaa, nutaaliorlunilu assit taakku atorlugit sermit iigartartut ukiuni kingullerni 80-it missaanni allanngoriartornerat nalunaarsorsimallugu, nersornaaserneqarnera ilaatigut taama tunngavilersorneqarpoq.
Angusai nunat tamalaat akornanni atugassiani siuttuusuni saqqummersinneqarsimapput, suliarujussuarlu paasissutissanik pingaarutilinnik tunniussaqarpoq Kalaallit Nunaannilu sermit iigartartut ilisimatusarfigineqarnerini atorneqarlutik, Dansk Geologisk Forening taama allappoq.
AAMMA ATUARUK Kunuunnguup kingullermik angalaneranit assilisat nassaaraat
Kurt H. Kjær assilisanik atuakkiamik ”Indlandsisen - 80 års klimaændringer set fra luften”-imik aaqqissuisutut Kalaallit Nunaata nunataa silallu pissusia pillugit paasissutissanik aamma saqqummersitsisimavoq.
Nersornaat 25.000 koruuninik aningaasartaqartoq Dansk Geologisk Foreningip Københavnimi ukiumoortumik ataatsimiinnerani Kurt H. Kjærimut tunniunneqarpoq.
Nersornaat Dansk Geologisk Foreningimi siulersuisut innersuussinerisigut Danmarkimi Kalaallit Nunaannilu Ujarassiuut Misissuisoqarfiannit (GEUS-imit) ukiut tamaasa tunniunneqartarpoq.