Kunuunnguup kingullermik angalaneranit assilisat nassaaraat

Nunat immallu assinginik aqutsisoqarfiup naqqata iluani ujarassiuup qallunaap Kurt H. Kjærip assit nassaarisimavai.

Aviisimi Politikenimi tamanna allaaserineqarpoq.

Allakkap puussaani allassimasoq Milthers ujarassiuup takugamiuk pasitsappoq, karsi tassaasoq tammaaneqaraluartoq. Knud Rasmussenip arfineq-aappassaa Thulimiit Tunup Kujataaata tungaanut 1932-miit 1933-p tungaanut ilisimasassarsiornerani Keld Milthers assiliisuusimavoq.

Assit timmisartumiit Nunap Isuata Illoqqortoormiullu akornanni assilisaapput. Sermeq assini tunuliaqutaavoq, assillu portussusilimmik, takissusilimmik silissusilimmillu, tassa tredemensionalimik, suliarinissaat Milthersip pilersaarutigisimavaa. Suliarlu taanna ujarassiuut maanna nanginniarpaat, sermit taamanikkut maannalu isikkui assersuunniassagamikkik.

- Silap pissusaa pillugu ilisimatitsissutigineqartartut, taamanikkullu qanoq issimanersoq, assini naleqqiukkutsigik, Tunup Kujataani ukiuni 80-ingajanni sermeq qanoq aakkiartortigisimanersoq eqqorluartumik paasisaqarfigisinnaanngussavarput, ujarassiooq Kurt H. Kjær aviisimut Politikenimut oqarpoq.