Sermersuup aakkiartornerani imaq 16 centimeterimik qaffassaaq
Nunatta sermersuata aakkiartornerata kinguneranik nunarsuatsinni immap 16 centimeterimik qaffannissaa piviusorsiortuusoq, danskit ujarassiuuisa misissuereerneranni inernerit takutippaat. Atuagassiaq Ingeniøren taama allaaserisaqarpoq.
Kalaallit Nunaata kujataani Tunumilu sermersuit tatsinut iigartartut akuinit ukiuni arlalinni misissuereerlutik, Københavnip Universitetiani ilisimatooq, Kurt Kjær aamma Aarhusip Universitetiani ilisimatooq, Nicolaj Larsen taama naliliipput.
Aamma atuaruk Ilisimatuut: Sermersuup aakkiartornera malinnaaffigaarput
Taakku misissuereerlutik naliliipput, ukiut 8.000-it 5.000-illu akornisa matuma siorna, nunarsuatta kiannerata nalaanni, Nunatta kissassusaa ullumikkumut naleqqiullugu gradenik sisamanik kiannerusimasoq. Tassalu tamanna tunngavigalugu nunarsuatta maanna kissakkiartoqqinnerani immap siunissami qanoq annertutigisumik qaffannissaa natsorsorneqarsinnaallualersimalluni.
Sermersuaq annertuupilussaq ukiut tamaasa aattarpoq
Nunatta sermersua ukiut 1000-it ingerlaneranni ukiumut 100 gigatonsi (100 milliard tonsi) iminnguuttarpoq. Tassalu tamanna pissutigalugu, nunarsuatta imartaa 16 centimeterimik qaffannissaa naatsorneqarsinnaalersimalluni. Tamanna atuagassiami Geologymi ukiup massuma aallartinnerani saqqummersinneqartumi atuarneqarsinnaavoq.
Aamma atuaruk Sermit iigartartut nunarsuarmi nassaassaasut aatsaat taama aakkiartortigisut
Ukiut 25-it kingulliit eqqarsaatigigaanni, Nunatta sermersua ukiumut 0-miit 400 gigatonsi angullugu iminnguuttarpoq, ukiut ilaanni iminnguunnera minnerusartoq ukiut ilaanni annertunerusarluni, atuagassiaq Ingeniøren allappoq.
Issittoq gradenik arfineq marlunnik kiannerulersinnaavoq
Silap pissusaanik ilisimatuut naatsorsuutigaat, Issittumi sila gradenik marlunniit arfineq-marluk tikillugit kiannerulerumaartoq. Tamannalu pissutaalluni sermersuup aannerani immap 16 centimeterimik qaffannissaa, Nicolaj Larsenip aamma Kurt Kjærip nalilerpaat.
Nunarsuatsinni sermersuit allat aamma nunarsusatta kiannerulerneranik erngup annertunerulernerata pilersitaannik nunarsuatsinni immap qaffannissaanik naliliinermi taakku ilanngullugit naatsorsorneqartut, atuagassiaq Ingeniøren allappoq.