Sermersuunngorneq akisooq
Kommuni aappaagu 2010-mi 111 millioni koruuninik amingartooruteqassasoq kommunalbetyrelsimit akuerineqarmat, piffissami 2009-miit 2011 ilanngullugu 297 millioni koruuninik amigartooruteqassaaq. 2012-imi aatsaat sinneqartoornissaq ilimagineqarpoq.
- Ingerlatsinermut aningaasartuutit oqimaaqatigiipput. Kisianni sanaartornermut atugassanik taarsigassarsissaagut, borgmesteri Asii Chemnitz Narup oqarpoq.
Kommunit inuttunersaanni akileraarut nikigani 42 procentiussaaq. Tassami kommuni aningaasanik uninngasuuteqarpoq. Nuup Kommunitoqaa aningaasarpassuarnik sillimmateqarnikuuvoq, kattunnermi iluaqutaalersunik.
Inissialiortiternermut allanillu sanaartornermut ukioq manna 356 millioni koruunit aappaagulu 277 millioni koruunit atorneqassapput, taakkualu Kommuneqafik Sermersuumi missinersuutitigut amingartooruteqarnermut ilaatigut peqqutaapput.
Innuttaasunik sullissineq ajorseriassanngitsoq, borgmesterip neriorsuutigaa, soorlu ulluunerani paaqqinnittarfinnut akiliutit nikissanngillat, atuarfinnilu nerisitsisarneq ingerlaannassalluni. Kisianni ingerlatsinnermut aningaasartuutit amerliartupiloorput, akileraarutinit isertitat amerliartornerannit sukkanerusumik. Kommunitoqqat tallimat assigiinngilluinnartut kattuneranni assigiissaarisoqartariaqarnera tamatumunnga pissutaatinneqarpoq. Taamaammat aningaasartuutit nakkutigeqqissaarneqartariaqarput.
Kommunit kattunnerannut neriulluartoqarsimaqisoq, bormesteri Asii Chemnitz Narupip isertuutinngilaa. Kisianni:
- Kommunit tallimat assigiinngitsorujussuarnik periarfissallit kattupput. Taamaattumik assigiissaarineq suliarujussuuvoq, aammalu naammassiniarlugu piorsagassaavoq, borgmesteri Asii Chemnitz Narup oqarpoq.
