Sermersuumi nunaqarfinni aqutsisut isumasioqatigeeqqammersut
Isumasioqatigiinnermi oqallisigineqartuartartut ilagaat nunaqarfinni inuunermik pitsaassusilimmik qanoq kivitseqatigiittoqarsinnaanersoq, ingammik nunatta aningaasarsiornikkut ingerlanerliornerata nalaani.
Borgmesterip kommunit aappaagu naligiissaarinissamut aaqqissuussinissaat ilisimatitsissutigaa. Isumaqatigiissut taanna naapertorlugu Kommuneqarfik Sermersooq kommuninut allanut 54 millionit koruuninik akiliinerusussanngorpoq.
Nunaqarfinni aqutsisut isumasioqatigiinnerat ulloq eqqorlugu borgmesterip Asii Chemnitz Narupip kommunimi sulisunik 75-inik soraarsitsisoqarnissaa tusagassiorfinnut nalunaarutigaa.
Nunaqarfinnut qanoq kinguneqassanersoq akissuteqarfigisinnaanngilaa
Naligiissaarinissamik aaqqissuussinerup nunaqarfinnut qanoq kinguneqartinneqarnissaanut tunngasunik borgmesteri nunaqarfinni aqutsisunut akissuteqarsinnaanngikkallarnerarpoq.
- Tamatuma nunaqarfittatsinnut qanoq sunniuteqarnissaa oqaatigissallugu maanna siusippallaarpoq, Asii Chemnitz Narup oqarpoq.
- Kiffartuussinikkut appariaallattoqarnissaa naatsorsuutigikannerneqarsinnaavoq, taamaattorli sapinngisamik annernannginnerpaamik ingerlanneqassaaq, Asii Chemnitz Narup oqarpoq.