Sermersuarmi akunninneq

Danskit silap pissusia pillugu nukissiuuteqarnermullu ministeriat, Lykke Friis, aamma ilisimatusarnermut ministeriat, Charlotte Sahl Madsen, tappavaneeqatigalugit, taamaalillutik nunatta silaata pissusiata siulittoruminaannersua misigaat. Nalunaaquttap akunnerini pingasuni takornariarnissaagaluaq nalunaaquttap akunnerinik 40-nik sivisussuseqarpoq.

- Tappavanilu misigisarput tassaavoq kiassuaq. Sermersuup qaavani  kiangaarami gradip affaanik issippoq, Palle Christiansen oqaluttuarpoq.

Kiaqimmallu timmisartoq Herculeseq, Palle Christiansenimik ministereqataanillu danskinik angerlaassisussaq qangattarneq ajulerpoq. Aput aqippallaarpoq timmisartorlu oqimaappallaarluni.

- Sisoraatit, Herculesip minnermut atortagai, apummut morsuttarput, taamaammallu sarpii naliginnaasut atorlugit aallariarnitsinni arfineq marlunni siullerni qangattarnissamut sukkaappallaartarpugut. Taava tinginermi iluaqutaasartunik rakettinik iluaqusersulerput, aatsaallu aqqanilissaanik rakettit arfineq pingasut tamaasa atorlugit tingeriaratta iluatsipparput. Kisianni aatsaat orsussarujussuaq userpassuillu kujammukaassassat nioreeratsigit taamaaliorsinnaalerpugut, Palle Christiansen oqarpoq.

Kinguartoorneq aallaqqaammut nuannarineqanngilaq.

- Angalaqataasorpassuit allanik aamma pisassaqaqaat, taamaammat sulineq eqqarsaatigalugu kinguaattoorneq pitsaavallaanngilaq. Kisianni soorlu danskinut ministereqatinnut oqartunga, Nunatsinni sila naalagaavoq, kiappallaarpallu nikissinnaanngilagut, ilisimatusarnermut naalakkersuisoq paasissutissiivoq.

Tassalu nikeriarsinnaanngillat - timmisartullu qangattarnissaanut piffissaq arlaannut atorneqartariaqarpoq.

- Arlaat volleyballiminik nassaarpoq. Taavalu aamma NEEM-imi mittarfiliornermut sulluliornermilu atortagaannik bambuserpassuaqariarmat, taamaattunik atorluta allunaasalerlugu minutsit tallimat atorlugit volleyballertarfiliorpugut, naalakkersuisunut ilaasortaq oqaluttarpoq.

Tassalu sermersuarmi 2,5 kilometerisut qatsitsiisumi aamma volleyballerpoq. Aamma allanik aliikkutassaqarput.

- Sermiminermik bar-iliorput, snescootererput langrenderlutillu. Soorlu aasarissuarmi pinngitsaaliissummik sisorariartitaalluni, Palle Christiansen oqarpoq.

Pissutsit ingammik danskit ministeriisa sungiukkuminaatsippaat:

- Isaasigut takusinnaavakka misigisut, soorluuna piviusuunngitsoq, arlallillu eqqarsarput; naamik taamaattoqarsinnaanngilaq: Sermersuup qaavani aasarimmi ingerlariaqqissinnaajunnaqqalluni, kiangaarmat. Tamarmimmi naatsorsuutigigaluarpaat, tappavani issittorsuussasoq, kisianni seqinnarissuuvoq kiallunilu, Palle Christiansen nassuiaavoq.

Utaqqinerujussuarlu aamma iluatsillugu ministerit piffissaqarfigisinnaanngikkaluakkaminnik tigussaasunik oqaloqatigiissuteqarput:

- Taava sermersuup qaavani susassaaleqerujuuleriaratta oqaloqatigiilerpugut, suut suleqatigiissutigisinnaanerlutigit. Assersuutigalugu danskit ilisimatusarnermut ministeriat, Charlotte Sahl Madsen oqaloqatigaara, GU-mi atuartortavut pinngortitaq pillugu ilisimatusarnermut tunngasunik paarlaateqatigiittarsinnaasut, Palle Christiansen naggasiivoq.

Taanna Nuummut tallimanngormat tikittussaagaluarluni, aatsaat sapaatiummat ullaap tungaa qulinut tikippoq.