Sermeq aangajassimasoq ajornartorsiutaavoq
Sermeq aangajassimasoq sermimik qillerisut ajornartorsiutigaat. Sermeq aangajassimasoq naluneqanngilluarpoq, tassami sermeq nunap qaavanut qanittoq nunap kissarneranit pissuteqartumik aattuungajassimasarmat minus 5 graditut nillertigaluni, taamaalillunilu qillerut ikkuttoortarluni. Taama aviisi Ingeniøren nassuiaavoq.
Taamaalisoorneq qillikkamut qerinaveersaammik kueraanikkut iluarsineqartarpoq, tamannalu tassa ippassaq pilluni.
Qillerinikkut ajornartorsiuteqaraluartoq sermiminernit 2 meterisut takitigisut putumillu kilometerit pingajussaat avillugu atsitsigisuminngaanniit qaqinneqartut takuniaasunit nunatsinneersunit nunanilu allaneersunit amerlangaatsiartunit angumerineqarput.
Takuniaasut amerlaqisut misissuisoqarfimmut ingerlanneqarput qillerutip nunap qaavanut anngunnissaani peqataaniarlutik.
Takuniaasulli misissuisoqarfimmi Neem-imi takuniaanerat sivikitsuinnaavoq. Taakkua nal. akunnerisa pingajussaasa affaanni misissuisoqarfimmiit timmisartoq Hercules sisoraatitalerneqarsimasoq atorlugu ingerlaqqittariaqarsimapput, tassami sermersuup qaava ima nillertigimmat, timmisartorsuup qangattarnialeruni sermimut ikkuttoornissaa timmisartortartup annilaanngatigimmagu.
Dorthe Dahl-Jensenip, misissuisoqarfimmi pisortaasup aammalu Neem pillugu suliassamut pisortaasup naatsorsuutigaa ullut sisamat-tallimat aatsaat qaangiuppata "Mission accomplished" nalunaarutigisinnaassallugu.
Kisiannili tassa 28. juli suli tassaavoq ilisimatusartut nunap qaavata angunissaanut isumalluarlutik killiliussaat, Ingeniøren oqaluttuarpoq.