Sermeq aakkiartortoq nunalu qaffakkiartorluni
Ilisimatooq nunarsuaq tamakkerlugu ilisimaneqartoq Oliver Francis atortorissaarutini uutuut ”absolute gravity meter” atorlugu nunarsuaq tamakkerlugu nunap nutsuineranik uuttuisarpoq. Ullunilu makkunani Nuummi uuttuileruttorluni.
-Atortorissaarissaarutitsinnit allamik pitsaaneqanngilaq. Uuttuinitsinnimi nunap nutsuinerani decimalit qulingiluat tikillugit uuttuisinnaavugut. Misissuinitsinilu paasissutissat ima pitsaatsigipput allaat NASA sulinitsinnut akiliuteqartariaqarluni. Paasissutissallu Kalaallit Nunaanninngaannit pissarsiarisakka ukiuni arlaqanngitsuni misissuiffigilluareeriarukkit paasisinnaalissavarput maani sumiiffimmi nunap nutsuinera qanoq annertutiginersoq. Maani 1987-miilli uuttuisarsimavugut, nunallu nutsuinera annikilliartuinnarpoq. Tamannalu isumaqarpoq nuna qaffakkiartuaartoq, Ilisimatooq Oliver Frances naqqup iluani tarrajuttumi taama oqaluttuarpoq.
Oliver Frances marlunngormat pingasunngormallu Kulusummiissimavoq, maannalu Nuummi marlunngorneq tikilligu uuttortaareeruni Qaqortumut ingerlaqqissaaq. Kingornalu uuttuinermi inernerit angerlarluni misissuiffigissavai.
-Kulusummi uuttuinitsinni paasivarput nunap qaava ukiumut 1,2 cm-mik qaffariartartoq. Naatsumillu oqaatigissagaanni sermersuup aakkiartornerani nuna qaffakkiartuinnavissaaq. Ukiut arfineq marluk iluani annertuumik allanngoriartortoqarpoq, tamannalu silannaap kissatsikkiartorneranik tunngaveqartoq ilimagilluinnarpara, Oliver Frances naggasiivoq.
