Seqineq pisarnerminit nuiaarneruvoq
Seqineq Ilulissanut januaarip ulluisa 13-ani nalinginnaasumik nuisaraluartoq, ullumi ullunik marlunnik siusinaarluni nuivoq.
Allattoq Janus Maqé
januaarip 11-at 2011 14:19
- Ataasinngorluinnalivissoq, tassa nalunaaqutaq 12:56:57 nuivoq. Ilulissani sakkortusaaviup eqqaaninngaaniit isiginnaarrapparput. Imaallaat seqineq suli ammalortuusoq paasivarput, Franz Petersen quiasaarluni oqarpoq.
Iluliarmiutoqqat ilaat 74-nik ukiulik Holger Sivertsen seqernup pisarnerminit nuiaarneruneranut tupigusuppoq.
- Soorunalimi tupigusunnarpoq assut. Tassa januaarip 13-ani nuisartoq uagut upperilluinnarparput, tassa Ilulissani ukiorpassuarni nuisarfia, Holger Sivertsen oqarpoq.
Taassuma oqaatigaa ilaatigut takuneqartarsimasoq januaarip 12-ani nuilaartoq.
- Allanngorsimaguni silarsuup ingerlaasia allanngorsimassooq, tamannalu siunissami maluginiartariaqarput, Holger Sivertsen oqarpoq.
