Seqernup pulanera Nunatsinnit aamma takusinnaassavarput

Seqernup tamakkiisumik pulanera takorusukkaanni Savalimmiunukartariaqarpoq, Illoqqortoormiuniilli seqernup 95 procentimik pulanera takuneqarsinnaassaaq, Ilulissanit 91 procentit Nuummiillu annikinnerulaassalluni.

Seqernulli pulanera takusinnaassagutsigu marlunnik pisariaqartitsissaagut. Siullertut, allaaqqittariaqassaaq, tamannalu ilimanarpallaarani, aappaattullu itiaartariaqassaagut.

Silagissappalli nalunaaquttap nikinganera Illoqqortoormiormiut Tunumiittullu allat iluaqutigissavaat, seqernummi pulanera nal. 8.48 annerpaaffimminiissammat. Seqernup pulanera tamaat malittariniaraanni, tamanna nalunaaqutaq 7.49-p 9.49-llu akornanni pissaaq.

Illoqarfigisannit takusinnaassanerlugu paasiniarsinnaavat.

Ilulissani seqineq nal. 6.23 nuissaaq seqinerlu piffissami tassani pulajartuleersimassalluni. Qutsissumut periarluni kangimut isigigaanni, seqineq 91,35 procentimik nal. 6.40 pulasimassaaq nal. 7.27-lu appakaatereersimassalluni.

Seqineq Nuummi Ilulissanit minutsinik sisamanik kingusinnerusukkut nuissaaq, tassalu nal. 6.27, minutsillu sisamat qaangiunnerini seqernup pulanera annerpaaffimminiissalluni. Taamaammat - qulisimasanngippat - qutsissumit kangimut isikkivigissumit isiginnaarnissaa pitsaasuussaaq.

Seqineq toqqarlugu sekundini ikitsuinnarni isigeqqusaanera eqqaamaneqassaaq, sivisunerusumik isigigaanni isip qinnguata ameraasaa atajuartussamik ajoquserneqarsinnaammat. Seqinersiutit nalinginnaasut filmitoqqallu iluaqutaasinnaanngillat. Allaammi svejserilluni isarussat naammattumik illersuutigineqarsinnaanngillat. Isarussat immikkut suliarineqarsimasut seqinermullu filterit atorneqartariaqarput. Taakkununnga taarsiullugu atorneqarsinnaasut pitsaanerpaat tassaapput pappialat qeratasuut marluk. Aappaa mikisunnguamik putussavat seqernullu qinngornera tassuuna putukkut pappialap aappaanut seqersillugu. Taamaattuliornissamut ilitsersuut uani takusinnaavat.

Seqernup pulanissaa tulleq pissaaq juunip qulingani 2021-mi.

Seqernup pulanissa pillugu paasissutissat allat uani atuarneqarsinnaapput (danskisoortoq).