Isikkamik arsaalluni GM Semifinalimut ingerlaqqittussat ilaat paasinarsipput
Ippassarlu unamminerit siullersaanni K-45 Qasigiannguaneersoq aamma FC Malamuk Uummannameersoq unammipput.
Qasigiarmiut Kugsak-45 arsarluarput FC Malamummullu takutitsilluarpallaanngitsumut 2-0-mik ajugaallutik. Qasigiarmiut unammisartui inuusukaajunerusut ilungersortinneqanngivissorput.
Unamminerit aappaat, K-33-p Qaqortumeersup T-41-llu Aasianneersup unamminerat, aamma pissanganarluarpoq.
Unammineq sivisunngitsumik ingerlareersoq K-33-p måliniittua ajoquserpoq anisariaqarlunilu. Qaqortormiullu målmandissamaateqannginnamik siukkamik ilaat målmandinngortittariaqarpaat, K-33-miulli tamanna nakeriallaatiginagu sivittunngitsoq 2-0-mik siuaqqalerput T-41-miullu inuusunnerusut tamaviaartariaqalersillugit.
Tamaviaarnermikkullu inissisimanertik 2-2-nngortippaat tassanngaanniillu unammineq sukkatsippoq. Aasiammiut inuusuttortaat suli perusupput K-33-miullu 4-2-mik ajugaaffigalugit unammineq naammassivaat.
AAMMA ATUARUK GM-ip ulluani siullermi målernerpassuit
Unamminerit pingajuat sakkortuvoq
Unamminerit pingajuanni G-44 Qeqertarsuarmeersoq SAK-lu Sisimiuneersoq unammipput.
Ilisimaneqartutut SAK tunumiunut unammeqaasinnaajunnartunut piffissaq kingulleq taartaasussatut GM-imut peqataasussanngoriasaarput. Sisimiormiullu pissartanngorniunnissamut sapaatit-akunnerat ataasiinnaq periarfissaralugu sungiusarsimapput.
Unammineq sakkortuvoq sukataarfiulluarluni. G-44-p unamminerup aallartinneraniilli unammineq aquttuusiinnarpaa unamminermilu måleqattaartuulluni. G-44-meersoq piginnaanilissuaq Zakorat Zeeb unamminermi målertut tulleraat, taannali mianersoqqussummik nittaavigineqarnermi kingorna unamminerup muminnissaa sioqqullugu taarserneqarpoq.
Unamminerup immikkoortuani siullermi G-44 malunnaateqarnerpaavoq, SAK-miullu sukataaraluarput unamminerulli inernerisassaa qularnaatsuuvoq, G-44 2-1-mik ajugaavoq.
Nuummiut unamminerat
Ullormut unamminerit sisamaanni kingullersaannilu Nuummiut IT-79 aamma B-67 unammipput. Unammineq takorannersoq pissanganartorlu, holdit tamarmik pikkorissorsuarnik unammisartoqarmata.
B-67 unamminerup immikkoortuani siullermi 1-0-imik siuaqqavoq, unammilerullu immikkoortuata aappaani 2-0 aamma siuarluni.
IT-79-miut sukataaraluarput ataatsimillu isertitsillutik, tamannali naammangilaq, IT-79 B-67-imut 2-1-imik ajorsarpoq.
Semifinalertussanngortut
B-67, K-45 aamma G-44 semifinalertussanngortutut oqaatigineqarsinnaanngorput, IT-79-illu aamma T-41-p semifinalimi inissaq kingulleq unammissutigisussanngorpaat.
Ullumi unamminissat aamma pissanganalaavissorput. G-44 aamma K-45 gruppiminni normu 1-nngorniutissapput, IT-79-ilu aamma T-41 semifinalimi inissaq kingulleq unammissutigissavaat.
Unamminerit tamaasa KNR-TV-kkut aallakaatinneqassapput, unammineq siulleq nalunaaqutaq ataatsimut aallartissalluni.
