Pituffimmi kiffartuussinissamik isumaqatigiissut pillugu ingerlatseqatigiiffiit nassuiaateqaqqusisut
KØBENHAVN: Greenland Contractorsip pisortaa taama isumaqarpoq. Taassuma Dansk Industri, suliffeqarfiillu allat peqatigalugit, Nunanut allanut tunngasunut ministereqarfimmut nassuiaanneqarumallutik ataatsimiigiarsimapput.
Greenland Contractorsip pisortaata Peter Kofoedip qallunaat kalaallillu Pituffik pillugu allanut attaveqarnerat naammaginngilaa.
- Suliap inernera taama isikkoqarpat, tungaanut piareersarluni sulineq naammassimanngilaq.
Taanna oqarpoq. Amerikamiut mittarfeqarfianni suliarinnittussarsiornermi amerikamiut suliffeqarfiutaat Vetrus ajugaareersorlu. Suliffeqarfiup Qallunaat Nunaanni immikkoortortaa Elexis Service A/S - taamaallaat Danmarkimi adressellip - aappaagu oktobarimiit Pituffimmi sullissinerit tamaasa pisussaaffigilissavai.
Aamma atuaruk Pituffimmi sullissiunnaarneq akisuvoq
Sakkutooqarfimmi ukiut 40-it sullissereerluni Greenland Contractors taamaalilluni isumaqatiginninngittoorpoq.
Tamanna Kallaallit Nunaata aningaasatigut iluanaarutissaraluinik suliffeqarfinnillu annaasaqaataassaaq. Aammattaaq tamanna Kalaallit Nunaannut Danmarkimullu Greenland Contractorsip erseqqissarniarsimagaluaraa, Peter Kofoed oqarpoq:
- Suliariumannittussarsiuleraangasa ileqqorput atoraluarparput: Ilisimaarigatsigu takkuttussaasoq. Ilisimavarput isumaqatigiissut atorunnaartussaasoq- tassa piffissaangallartillugu Nunanut allanut tunngasunut ministereqarfik Danmarkimiittoq, Namminersorlutillu Oqartussat Nuummiittut ilisimatippavut suliariumannittussarsiuisoqalersoq. Aammalu ajornartorsiummik ilisimatillugit, minnerunngitsumik Kalaallit Nunaanni inuiaqatigiit iluanaarutigisarmassuk.
- Saaffiginnissusersi ministereqarfiup Namminersorlutillu Oqartussat qanoq qisuariarfigaat? Aperineqarpoq akillunilu:
- Pisoqarnerani naatsunnguanik akissutisisarpugut ajornartorsiut eqeersimaarfigineqartoq. Namminersorlutik Oqartussallu akipput kalaallit soqutigisaat sulissutigineqarumaartut.
Aamma atuaruk Pituffimmi kiffartuussinissamik isumaqatigiissutip annaaneqarnera politikerit ernumanartoqartikkaat
Qallunaalli kalaallillu allanut attaveqarnerat naammaginarsimanngitsoq, Greenland Contractorsip pisortaa oqarpoq.
- Paatsuungassaanngitsumik piumasaqartoqarsimanngilaq, isumaqatigiissuteqarniaraannimi kalaallit-qallunaallu suliffeqarfiutaattut isigineqartariaqarpoq. Tamannali arlalitsigut allatut isummersorneqarsimavoq. Oqartariaqarpugullu inernera taamaappat tungaanut suliaq naammassimanngilaq.
Isumaqatigiissut Greeland Contractorsit naammagittaalliutigissanerlugu maanna eqqarsaatigivaa.
Naalakkersuisut siulittaasuata allaffeqarfianiit, Nunanut allanut tunngasunut ministereqarfimmiit, Dansk Industrimiilluunniit oqaaseqartitsisinnaasimanngilagut.